SHILLONG, ïaïong 06: Ka Shillong Lajong FC kan bteng ïa ka jingïaid lynti jong ka ha ka lympung Indian Football League 2025-26 ha kaba kan ïakhun pyrshah ïa ka Dempo SC ha kane ka sngi Ba-ar ha ka por 6:30 baje ha PJN Stadium, Goa.
Kane ka jingïakhun ka dei ka jingïalehkai kaba saw sien lynter jong ka Lajong shabar nala ïing (away), katba ka dang bteng ban pynneh pynsah ïa ka jingsdang kaba khlaiñ jong ka ha kane ka samoi, da kaba jop ar sien bad ïakhaid kawei ha ki lai tylli ki jingïalehkai shabar nala ïing ba ladep.
Ka kynhun ka la pyni ïa ka jinglong ba ïaineh bad ka jinglah ban shah da kaba kamai 11 point hadien 6 tylli ki jingïalehkai, bad ka jingjop mynta ka janmiet ka lah ban kyntiew ïa ka Lajong sha khlieh duh ha ka miej ïakheiñ jong IFL 2025-26.
U coach ka kynhun u Birendra Thapa u la pynpaw ïa ka jingkyrmen hashwa ban jam sha ka jingïakhun, da kaba kdew ïa ka jinglong ba la khreh jong ka kynhun. Hynrei u la kloi ban pynpaw ba ka kynhun kan ym kheiñ sting ïa ka kynhun liang pyrshah jong ka.
“Ka Dempo ka dei ka kynhun kaba don ïa ka bor watla hapdeng ki resol ba la mih dang shen. Ngi burom ïa ki bad ngin jam sha ka jingïalehkai da kaba shimkhia bad ka rukom ïalehkai kaba ryntih,” u la ong.
Ka jingjop ïa ka Shillong Lajong FC ym tang ba ka la lah ban kyntiew ïa ka sha ka kyrdan ba ha khlieh duh jong ka miej ïakhein point hynrei ka lah ruh ban pynskhem ïa ka kyrdan ban jingpynthikna ïa ka jaka ha ka Championship Round na ka bynta ka Stage 2.
ïa kane ka jingïalehkai yn pyni live ha ka Sony Sports Network, Doordarshan Sports, bad OTT platforms Sony LIV bad Waves.
