1st PA Sangma Memorial T20: Pynliem ka Rangkynsai SC ïa ka Rhinoland CA; kamai spah ron u Kishan

Shillong, ïaïong 06: U Kishan Lyngdoh u la tied palat ïa ka spah ron ban ïalam ïa ka Rangkynsai SC sha ka jingjop da 8 wiket pyrshah ïa ka Rhinoland Cricket Academy ha ka jingïalehkai Super 8 jong ka Group 2 ha ka lympung Late P.A.Sangma Memorial T20 Cricket Tournament 2026 ba la pynïaid da ka Shillong Cricket Association, hynne ka sngi Nyngkong ha madan kriket ha Polo.
Haba kam trai ban boling nyngkong hadien ba jop ïa ka jingkynting pisa (toss) ka Rangkynsai SC ka la lah ban khanglad ïa ka Rhinoland CA tang na ka bynta 171/8 haduh kaba kut ki 20 ober, nangta ka la pyndep ïa ka kamram ban poi sha ka thong da kaba kynjoh 175/2 haki 16.1 ober.
Ha ka pali tied jong ka Rhinoland CA u Sumit Kashyap (42 ron naki 28 bol) bad u Dhruv Raj Bora (39 ron naki 25 bol) ki la long ki nongtied ba kongsan tam; katba u Ajay Duhan (khur 4/22 naki 4 ober) bad u Sudhir Sahani (2/49 naki 4 ober) kidei ki nongkawang bol ba seisoh tam jong ka Rangkynsai.
Kumba la kdew, u Kishan Lyngdoh u la long u namtam ha ka pali tied jong ka Rangkynsai SC, ha kaba u la khyrwit haduh 120 ron naki 58 tylli ki bol bad pynkut ïa ka jingïalehkai ryngkat ka khusnam Player Of The Match. Uwei pat u nongtied uba la noh synñiang bun ron udei u Ajay Duhan (36 ron naki 30 bol).