Na ki 219 tylli ki skul ba ïoh Science grant, khlem pat ïoh adhoc grant pat ki nonghikai, ong ka MSWDA

Shillong, Ïaïong 05: Ka Meghalaya School Welfare Development Association (MSWDA) lyngba ka kyrwoh khubor ka la pynpaw ïa ka jingbym sngewtynnad halor ka jingbym shimkhia jong ka Sorkar Jylla ïa ki jingsngewkhia jong ki, kiba ïadei bad ki skul Secondary bad Higher Secondary.
Lyngba ka kyrwoh khubor, na ka liang u President ka MSWDA H M Marbaniang ula ong, “Ka Association ka sngewsih jur halor ka jingbym leh eiei halor ki jingeh jong ki skul Secondary bad Higher Secondary kumba la pynpaw ha ka dorkhas ba la aiti ha u Myntri ka Tnad Pule Puthi mynha ka 4 tarik Ïaïong 2025.”
La ong ba katkum ka Directorate of School Education and Literacy (DSEL), ki don haduh 29 tylli ki skul sorkar, 17 tylli ki Deficit, 69 tylli ki Adhoc Higher Secondary School bad 121 tylli ki skul Deficit Secondary.
Hynrei, bun na ki skul kim shym la ïoh ïa ka grant-in-aid, ha kaba 219 tylli ki la ïoh ïa ka Science grant khlem ka adhoc grant ïa ki nonghikai kiba dei jong ki general subject.
Ha ka kyrwoh khubor na u Bah Marbaniang ka ong, “Ka Sorkar ka la leh klet ïa ka jingkyrpad jong ki skul bapher bapher kiba la tyrwa lyngba ki DSEO bad DSEL,” haba kyrpad ïa ka Sorkar ban ai lem ïa ka grant-in-aid sha ki skul kiba dei hok ban ïoh.
Ka MSWDA ka la khot ïa ka General Meeting ha ka 6 tarik Ïaïong, 2026, ban ïakren ïa kine ki kam, kynthup ki skul SSA bad ka jingthungkam ïa ki nonghikai ha ki jaka ba lait.
Ha kane ka jingïalang yn wan ban ïashim bynta da ki dkhot jong ki School Management Committee, ki Principal bad ki Nonghikai.