Ka Shnong Umpyrshin ka la don naduh u Snem 1970, ka don hapdeng ka shongsuk shongsaiñ: WS

Jowai, Ïaïong 03: U Waheh Shnong ka Umpyrshin East Jaiñtia Hills District u ma J.N. Suchen ha ka kyrwoh khubor ba la phah mynta ka sngi u kwah ban pynshai halor ka jingkynthoh bym shong nongrim jong ki Ar tylli ki Shnong kata ka Huroi bad ka shnong Lahaleiñ.
Ula pynpaw ka Shnong Umpyrshin kaba la don naduh u Snem 1970 ka long ka Shnong kaba shong suk shongsaiñ bad kala don ki sakhi sabud ba biang kiba la pynshai naduh ka 18 tarik u Rymphang, 2026.
Katkum ka Social Media kaba la mih ha ka 31 tarik u Lber, 2026 ba la kynthoh da ka shnong Huroi bad ka Lahaleiñ ki long ki bym don nongrim namar ba ka Shnong Umpyrshin ka long kaba la rim bad ka la don ruh ki kot ki sla kiba long ki sakhi ban pynshisha ba ka dei ka shnong ka ba pura, kine ki jngkynthoh jong ka shnong Huroi namar ba ka don hapoh jong ka Narpuh Reserve Forest Block-I bad ka shnong Umpyrshin ka don shabar bad la pynïakhlad ïa kine da ka Wah Huroi (Sep sngi ka Shnong Huroi, Mihsngi ka Shnong Umpyrshin).
Ka jingkynnoh jong u Raja Suchen pyrshah ïa u ba u knieh ïa ka jaka ne ka hok jong ki briew, u kwah ba un ïathuh ïa ka kyrteng jong kita ki briew kiba ula knieh ïa ka jaka jong ki namar kum u Waheh Shnong jong ka Shnong Umpyrshin um ju tip ruh ïa kata ka jingkynnoh ka jong u ba un sngewbha ba ai ïa ki kyrteng jong kita ki briew kiba u la pynsngew ha ka 31 tarik Lber, 2026 ha ka Rally kaba long ha Jowai namar ula pynjah burom bad pynbud nam ïa ka kyrteng jong u bad ka shnong hi baroh kawei.
Ka jingkynnoh jong u Balu Swer ba dei u Dkhot jong ka Elaka Rymbai, kane ka jingkynnoh jong u ka bym don nongrim, ha ka jingshisha ïa ka Shnong Umpyrshin la don hapoh ka jong ka Constitution jong ka District Council naduh 05 Nailar , 1983, haka juh ka por ruh la ithuh da ka Dorbar San Shnong kita Hingaria, Huroi, Umpyrshin, Lejri bad Lahalei? ha ka 20th January, 1985, ïa kane la pynshisha ba ka Shnong Umpyrshin ka don naduh mynshwa bad ka don ruh shibun ki sakhi satar kiba pynshisha ba kane ka dei ka shnong ba pura kaba don la jong ka hok laitluit. Wat ïa ka Water Supply Scheme ruh la ïoh na ka ophis Sub-Divisional Jowai kaba la ïohpdiang ha ka 20 tarik u Lber, 2002 ba la sanction ha ka kyrteng jong ka shnong Umpyrshin/Ampyrshin, ïa kane la knieh jubor da ka Shnong Huroi ban ïoh shna hapoh shnong jong ki bad kumta ki dang nud ban len ba ka shnong Umpyrshin ka dei tang ka dong kane ka long ka bym shong nia bad ka bym don nongrim ïa ki jingkynnoh jong ki.
Sngewsih ban ong ba ha ka 12 tarik u Lber, 2026 ki bym ithuh kyrteng ha ka por shiteng synnia ki la pynjot pynpra ïa ka Sign Board jong ka Shnong Umpyrshin bad ki la dep ban ai FIR sha Police Post Umkiang. Te ha ka juh ka por ha ka jingïaid rali jong ka Shnong Huroi bad ka Shnong Lahalei? ha ka 31 tarik lber, 2026 ha ka por kumba 9:30 baje mynstep eiei ki la pynjot biang ïa ka Sign Board jong ka Shnong Umpyrshin bad nangta hadien ba la ai FIR la kyrpad ïa ki bor ba halor kiba dei peit ïa ka shongsuk shongsaiñ ba kin ai ka jingïada ïa ka Shnong Umpyrshin namar ba kine ki briew ki bynrngem, byrsit ïa u Waheh Shnong Umpyrshin, te khnang ban lait na ka jingsngewsih.
Shuh shuh ula pynshai halor ka jingkynnoh jong u Golden Marbaniang ba u Johny Suchen u kam Rangbah Shnong ïalade hynrei kane ka long kaba khlem nongrim namar la jied ïa U Rangbah Shnong da ka Dorbar Shnong Umpyrshin, ym dei kumba la kynnoh u Golden Marbaniang ba ki tei ki jingkynnoh ki long kiba lamler bad ki bym don nongrim kine ki long tang ban pynbeij bad ban pynthame ïa u paidbah.
Katkum ka shithi kaba la thoh sha u Deputy Commissioner, East Jaiñtia Hills Khliehriat ba kin pynbeit ïa ka jingkyntur pud bad kam jaka jong ka shnong Huroi shapoh ka area Shnong Umpyrshin, la kyrpad ban pyndep kloi ïa kane ka jingïakajia pud hapdeng ka Shnong Huroi bad ka Shnong Umpyrshin katkum ka shithi ba la phah sha u Deputy Commissioner tarik 26 Lber, 2026 ïa kaba la ai copy ruh sha u Superintendent of Police, Khliehriat bad sha U Divisional Forest Officer Jaiñtia Hills Division, Jowai bad sha u CEM ka Jaiñtia Hills Autonomous District, Council bad sha ka Elaka Rymbai.