Ka jingpeit bniah bad rukom treikam ka India ban pynkhreh ïa kano kano ka jingjia, ong u Rajnath Singh

New Delhi, Ïaïong 03: Ka jingïalang kaba ar jong ka Informal Group of Ministers (IGoM), kaba la seng ban peit ïa ki jingjia ha ka thaiñ sepngi jong ka Asia bad ai jingmut ïa ki sienjam ban pynduna ïa ka jingktah ïa ka India, ka la long hapoh ka jingïalam jong u Myntri ka tnat ïada Ri Rajnath Singh ha Kartavya Bhawan-2, New Delhi ha ka 2 tarik u Ïaïong, 2026. Ka IGoM ka la ïakren bniah shaphang ki jingjia bad ki sienjam ban shim da ka Sorkar ban pynduna ïa ki jingktah kiba mih na kane ka jingkulmar.
Ka Myntri ba dei khmih ïa ka tnad kam pla tyngka bad kam kompeni ka Nirmala Sitharaman; Myntri ka tnad Petroleum and Natural Gas Hardeep Singh Puri; Myntri ka tnadkam Bording Manohar Lal; Myntri ka tnad Chemicals & Fertilizers Jagat Prakash Nadda; Myntri ka tnad Kam bar ri Dr S Jaishankar; Myntri ka tnad Consumer Affairs, Food and Public Distribution Prahlad Joshi; Myntri khynnah (Independent Charge) ka tnad Science and Technology Dr Jitendra Singh; bad Myntri ka tnad Railways, Information and Broadcasting, Electronics & Information Technology Ashwini Vaishnaw ki la ïashim bynta ha kane ka jingïalang.
Namar ka jingartatien halor kane ka jinglong jingman, u Myntri ka tnat Ïada ri u la ban jur halor ka jingdonkam ban peit bniah ïa ki jingjia bad ban shim ïa ki sienjam ban pynkhreh ïa kano kano ka jingjia. U la ban jur halor ka jingdonkam ban shim lut ïa ki sienjam ban pynthikna ba ki briew jong ka ri ki ïakynduh ïa ki jingeh kiba duna tam namar kane ka jingkulmar.
Ha kane ka jingïalang ki hynñiew tylli ki Empowered Groups of Secretaries ki la ai jingtip ïa ka IGoM shaphang ki sienjam ba la shim ban ïaleh pyrshah ïa kane ka jingeh. La pyntip ïa ka IGoM shaphang ki sienjam ba la shim da ka tnat Finance ban pynbeit ïa ki jingeh kiba mih na ka jingshah ktah ka kam khaïi pateng ha ka pyrthei bad ban ai jingïarap bad jingkyrshan ïa ki kam, khamtam ka kam pynmih mar, bad kyntiew ïa ka jingsngew shngaiñ jong ki nongbei tyngka. Kine ki kynthup ïa kine harum:
Ka jingpynbna ha ka 1 tarik u Ïaïong, 2026 kaba la pynmih ha kaba ïadei bad ka jingpyllait bai customs na ka bynta ki 40 tylli ki mar petrochemical ba kongsan haduh ka 30 tarik u Jylliew, 2026.
Ka jingpynbna ïa ka sienjam ba shisien ban ai jingïarap ïa ki SEX ban sei ïa ki mar ha ka Domestic Tariff Area (DTA) ha kaba la ïoh ïa ka bai customs kaba kham duna ka ban treikam naduh ka 1 tarik u Ïaïong, 2026 haduh ka 31 tarik u Lber, 2027.
Ka jingpynbna ha ka 31 tarik u Lber, 2026 ba la ai da ka DoR kaba pynshai ba yn ym pyntreikam ïa ki bynta jong ka GAAR ha kaba ïadei bad ki jingbei tyngka kiba la pyndep shuwa ka 1 tarik u Ïaïong, 2017.
Kine ki sienjam kin pynduna ïa ka jingeh ha ka jinglut ha ki bynta ba shapoh kynthup ïa ki kam kiba ïadei bad ki jaiñ, ki jingsong ïa ki mar bad ki dawai, kin pynsuk ïa ka jingpynbiang mar ha ka ri bad kin ai ïa ka jingshai kaba donkam na ka bynta ki nongbei tyngka kiba pyrkhat ban bei tyngka ha India.
U Rajnath Singh u la ïaroh ïa ka rai jong ka Sorkar ban buh pud haduh 25% ha ka jingpynkiewdor ïa ka Aviation Turbine Fuel na u bnai sha u bnai na ka bynta ki kam hapoh ka ri, ka ban treikam naduh ka 01 tarik u Ïaïong, 2026. Kane ka sienjam kan ïarap ban ïada ïa ki paidbah na ka jingkiew kynsan ka bai leit bai wan, u la ong.
Ka Sorkar ka la buh hakhmat eh ïa ka jingpynbiang ïa ka LPG hapoh ka ri, da kaba pynbha ïa ka jingpynmih jong ki karkhana khnang ban pyndap pura ïa ki jingdonkam. La pyntip sha ka IGoM ba ym shym la don kano kano ka khubor ba la don ki jingduna ha ki jaka sam LPG, bad ka jingpynpoi ïa ki cylinder LPG hapoh ka ri ka dang ïai bteng katkum ka por ba la buh. Ki jingeh ha ka jingpynbiang mar shipor ki la mih namar ki jingjia jong ka jingpynlang ïa ki mar bad ka jingdie beaiñ ha ka dor kaba kham heh ïa ki mar, kaba la pynmih ïa ka jingthied kyrkieh ha ki katto katne ki jaka.
La pyntip ïa ki Myntri ba la shim ïa ki sienjam tyngeh, da kaba pynlong ïa ki jingkhynra ha kylleng ki Jylla/Union Territory ban tehlakam ïa ka jingpynlang bad jingdie beaiñ ha ka dor kaba kham heh ïa ka LPG. La shim ruh ïa ki sienjam pyrshah ïa ki katto katne ki nongsam LPG kiba leh ïa ki kam beaiñ.
Ban kyrshan ïa ki nongbylla sngi bad ki longïing kiba duna ka jingpyndonkam ïa ka LPG, ka Sorkar ka pynthikna ïa ka jingdon jong ki tyndong LPG Free Trade kiba 5 kg, bad naduh ka 23 tarik u Lber, 2026, la die palat 4.3 lak tylli kum kine ki tyndong. La ai jingmut kyrpang ïa ki Jylla ha kaba ka jingdawa ka kham bun.
La pyntip sha ka IGoM ba la pyndep ïa ki jingdonkam jong ki karkhana kiba shaniah ha ka LPG, ha kaba palat 80% na ka jingpynbiang shwa ka jingeh la pynneh ban pynthikna ïa ka jingbteng jong ki jingtreikam. La pynlong ïa ki jingïalang ba kyrpang bad ki tnad bad ki nongshim bynta jong ki karkhana bapher bapher ban sngewthuh ïa ka jingdonkam jong ki bad ban pynbiang ïa kane. Ki PSU umphniang ki pynthikna ïa ka jingbteng ban pynbiang ïa ka Auto LPG ha kylleng ka ri. Hynrei ki don ki jingeh ha ka jingpynbiang mar kiba ki nongpynïaid shimet ki ïakynduh namar ki jingeh ha ka jingthied mar jong ki, dei na kata ka daw ba la ïohi ïa ki jingbun briew ha ki pump LPG auto jong ka PSU. Hangno hangno ba ki auto ki long dual feed bad ki lah ban pyndonkam da ka petrol, la pynshlur ïa ki ban pyndonkam da ka petrol.
La pyntip ïa ki Myntri ba ïa ka pynpynpoi ïa ka LPG ha ka shisngi ban pyndap ïa ka jingkiew ka jingdonkam kaba mih namar ka jingthied kyrkieh, ban pynthikna ba kan ym don ka jingduna na ka bynta ki nongthied. La pynshlur ban shim ïa ka Piped Natural Gas (PNG) ban shim na ka bynta ban pyndonkam ha ki karkhana kum ka lad kaba lah ban shaniah ha ki jaka ban leh ïa kane. La pynthikna ïa ka jingpynbiang ïa ka PNG na ka bynta ka jingpyndonkam ha ki karkhana ha ki bynta ba la dep pyndonkam ïa ka, da kaba pynneh ïa ka jingbteng jong ka jingtreikam.
La pyntip ruh ïa ka IGoM ba ki don katto katne kiba leh ïa ki kam beaiñ kiba pyrshang ban wanrah ïa ka jingtieng da kaba pynsaphriang ïa ki dur ba la photoshop bad pynkylla dur bad ki jingthoh kiba ïalam bakla ha ka social media. Ïa kum kine ki jingleh la buddien bha. La kyntu jur ïa ki nongshong shnong ba kim dei ban ngeit ne ïasam ïa ki jingtip ki bym pat pynshisha bad ban shaniah tang ha ki tyllong khubor ba thikna na ka bynta ki jingtip ba thikna.
Ka jingïalang kaba nyngkong jong ka IGoM ka la long ha ka 28 tarik u Lber, 2026, ha kaba u Myntri ka tnat iada ri u la bthah ïa ki heh sorkar ban buddien bha ïa ka jinglong jingman, ban shim ïa ka rukom pynkhreh, ban pynneh ïa ka jingïatreilang kaba ha khlieh duh, bad ban pynthikna ïa ka jingshim rai kaba kloi.