Shillong, Naitung 12 : U Myntri Rangbah ka jylla, Conrad K Sangma hynne ka sngi u la pynbna ba ki Census Town ruh nangne shakhmat kin ïoh ban pyntreikam noh ïa ka skim MGNRESG ba la ju tip kum ka skim bylla 100 sngi.
Kumta halor kane, na ka liang u MLA ka Mawlai, Bah PT Sawkmie u la ai ka jingsngewnguh ïa u Myntri Rangbah ka jylla kumjuh ruh ïa u Myntri ka tnad C&RD Bah Hamlet Dohling halor ka jingkynthup lang ïa ka Mawlai ha ka thup jong ki census town ban ïoh jingmyntoi lang na katei ka skim 100 sngi.
Haba kren bad ki lad pathai khubor, u MLA u la ïathuh ba mar ïa jop kum u MLA u la rah ïa katei ka ishu ban kynthup lang noh ïa ka Mawlai ban ïoh lang ïa katei ka jingmyntoi hynrei kadei hadien saw snemba u long kum u MLA u la ïoh ban sakhi ba katei ka kam ka la urlong.
Shuh shuh u ong ba ka Mawlai kadei ka constituency kaba heh bha ha kaba ka jingdonkam ka la long kaba bun bha. U ong ruh ba, baroh shi katta kiba myntoi na katei ka skim 100 sngi kidei tang ki shnong kiba hap ha ka Them Mawlai.
Kumta,u la ong ba kum u nongmihkhmat naduh ba sdang hi ryngkat ki nongïalam shnong ki la buddien lang na ka bynta kane ka skim bad kumta mynta ki sngewkmen ba ka la urlong.
