Rakhe 150 snem ka shnong Lawjynriew, ïaroh u CM ïa ka jingnoh synniang ki Dorbar Shnong

Shillong, Lber 29: U Myntri Rangbah ka jylla u Conrad K Sangma, ha ka sngi Saitjaiñ u la plie ïa ka jingrakhe dap 150 snem jong ka Lawjynriew Dorbar Shnong ha ka prokram kaba la long ha Lawjynriew Football Ground, Nongthymmai. Ha kane ka sngi la donlang u Myntri ka tnat Pule Puthi bad Information & Public Relations etc u Bah Lahkmen Rymbui, u MLA, Nongthymmai, Bah Charles Pyngrope bad u Chief Executive Member, KHADC, Bah Winston Tony Lyngdoh.
Haba kren ha ka jingïalang u Myntri Rangbah u Conrad K Sangma, u la pynpaw ka jingkmen ban ïashim bynta ha kane ka jingrakhe ka ban sah ha ka khana pateng bad ka jingrakhe ïa ka jingdap kaba 150 snem jong ka Shnong Lawjynriew da kaba pynpaw ki jingai khublei ïa ki nongshong shnong ka Lawjynriew bad bynrap, “Ka jingpdiang sngewbha lyngba ki jingshad tynrai Khasi, ka jingshad ki deiriti bad kiwei ki prokram kiba ngi la sakhi mynta ka sngi ki pynphalang ïa ka jingriewspah ka jinghiar pateng bad ka jingïalong kawei jong ka shnong. Kadei ka jingpynkynmaw kaba sarong kaba kumno kum ki briew ngi long.”
U la ong shuh shuh ba ka khana jong ka Lawjynriew kam dei tang ka khana, hynrei ka jingïathuh khana kaba ngam jylliew kaba don ka jingïadei da ka jingkiew jong ka Shillong bad ka khana pateng jong ka jylla.
“Na ki sngi kiba rim hapoh ki jingsynshar tynrai jong ka Hima Mylliem lyngba ka land registration ha u snem 1876, kane ka shnong ka ïeng hapdeng ka por jingshah tynjuh,” u la ong bad ïaroh ruh ïa ki nongshong shnong jong ka shnong Lawjynriew kiba la pynneh pynsah ïa ka jingithuh da kaba shim lang ruh ïa ki jingkylla,” u la ong.
U Myntri Rangbah u la ong ba ka jingkhraw kane ka jaka ka long halor ka jingdonlang ki jaka pule kiba kongsan bad ki jingnoh synniang ha ka pule puthi bad ka jinglong ka jingsngew shipara bad ki jingïaid shaphrang jong ki kam.
Halor ki kam jong ki shnong ki thaw bad ki jaka treikam hapoh ka imlang sahlang u Myntri Rangbah u la ong bad ka Dorbar Shnong ka bteng ban leh ki kam kiba kongsan. “Kine ki shnong ki thaw ki dei ki païa kiba khlaiñ ha ka synshar khaddar, ba pynthikna ïa ka jingïashim bynta jong ki nongshong shnong, ban pynneh ïa ki kam ki mynbarim, bad ban pynneh ïa ka jingïalong shipara,” u la ong da kaba ïaroh ïa u Rangbah Shnong bad baroh ki dkhot jong ka Dorbar halor ki jingtrei shitom bad ki kam nongïalam.
Ha kane ka sngi u Myntri Rangbah u la pynbna ban ai jingïarap sha ka dorbar shnong ka pisa kumba T. 30 lak napoh ka Chief Minister’s Special Development Fund halor ki jingdonkam jong ka shnong. U Myntri Rangbah u la plie ruh ïa ki Projek bapher bapher jong ka Dorbar Shnong Lawjynriew kiba kynthup ia ki CCTV, 8 tylli ki location signages ha kylleng ka shnong, la plie ïa ka website bad ka dashboard. U la pynkup burom ruh ïa ki nongïalam bad ki tymmen ki san ha kane ka prokram.