Jowai, Lber 29 : Ka West Jaiñtia Police CC ka la khur ïa ka jingjop ha ka jingïalehkai Quarter Final kaba ar jong ka District Cricket League 2026, hadien ba la pynkut noh ïa ka jingïalehkai da ka DLS Method namar u slap uba jur.
Ha kane ka jingïakhun pyrshah ïa ka Ummulong SC, ka West Jaiñtia Police CC kala jied ban tied nyngkong bad ka la lah ban kamai 169 run na ki 34.1 over shuwa ba kila hap lut baroh ki wicket. U Markini Lathong u la long uba kongsan tam ha ka batting da kaba tied 37* run na ki 69 bol, katba u Captain Obadaia Bareh u la pynbud da 35 run na ki 31 bol.
Na ka liang ki bowler jong ka Ummulong SC, u Pynskhem Phawa u la leh bha da kaba shim 3 wicket na ki 5 over, katba u Heimonlang Lyngdoh u la ïoh 2 wicket na ki 7 over.
Ha ka inning kaba ar, ka Ummulong SC ka la sdang ban beh ïa ka thong hynrei ka la lah ban kamai tang 87 run na ki 22.2 over bad hap 8 wicket. U Sylvester Mylliempdah u la tied bun tam da 36 run na ki 42 bol.
Na ka West Jaiñtia Police CC, u Monjur u la long uba pawnam ha ka bowling da kaba shim 4 wicket na ki 4 over bad u la ïoh ruh ïa ka nam Man of the Match.
Hynrei, hapdeng ka jingtied jong ka Ummulong SC, u slap uba jur u la pynsangeh ïa ka jingïalehkai hadien ba la poi sha ka 22.2 over. Hadien kumba shiteng kynta ka jingpynthut, ki umpire ryngkat bad ki captain jong ki ar tylli ki team ki la rai ban pyntreikam ïa ka DLS Method ban rai ïa ka jingïalehkai.
Katkum kane ka rukom kheiñ, ka Ummulong SC ka dei ban poi sha ka score 150 run ha ka 22.2 over, hynrei ka la duna haduh 63 run. Kumta, la pynbna ïa ka West Jaiñtia Police CC kum ka lahduh ha kane ka jingïalehkai.
