Shillong, Lber 29 : Ka jylla ka la nang kiew ka jingdon ki referee kiba la tbit ban pynïaid ïa ka jingïalehkai phutbol hadien ba ki la don sa lai ngut ki referee/assistant referee kiba la pyndep ïa ki eksam ban kiew mynta sha ka kyrdan (Level) 5 hapoh ka All India Football Federation (AIFF).
Kine ki lai ngut ki kynthup ïa ka Pipilmoris Wanniang (women’s referee), Shidalin L Marshillong (women’s assistant referee) bad Jespar Syiemlieh (men’s assistant referee).
Kane ka eksam ka la long ha ka 25 bad 27tarik mynta u bnai ha LNIPE Gwalior. Mynta kine ki kyrtong kiba pass kin hap pat ban pyndep sa ïa ka practical bad viva ha ki khyndiat por ban wan.
Ha kane ka Level 5, ka dei ka kyrdan kaba plie lad ïa ki referee bad ki assistant referee ban pynïaid ïa ki jingïakhun ha ki lympung ïalehkai jong ka Ri, bad ka long ruh ka jingkhang ba kin kiew sha ka Level 1 na bynta kito kiba kham tbit.
Katba na ka bynta ki Level 6-8 pat ki dei na ka bynta ki lympung ïalehkai ha ki jylla ne kum kita ki state level referee/assistant referee.
