Ka jaka sumar dawai kynbat Khasi ha Sohpian ka la ïaid bha mynta, ong u bah F.Lyngkhoi

Nongstoiñ, Lber 02 : Ka jing don jong ka jaka sumar da ki dawai kynbat Khasi paka ha ka shnong Sohpian West Khasi hills ka la long ka jingkyrkhu kaba khraw ïa kiba pang ba shitom kiba leit ban pah sumar ha katei ka jaka. Kum ban pynkynmaw ba ïa katei ka jaka sumar la shna da ka Synjuk Ki Nongai Dawai Khasi Nylla ba pisa da ka sorkar pdeng lyngba ka BRDC jong ka sorkar jylla bad la plie ha u snem ba la dep da u bah HM Shangpliang MLA barim ka Mawsynram. Ha kane ka lah sngi u blei ka 02 tarik Lber u nongthohkhubor u la hiar ban leit jngoh ïa katei ka jaka ai jingsumar bad la lap ba u nongsumar u lah don ha katei ka jaka bad la lap ruh ba ki dawai kynbat Khasi ba bun jait ba kynthup ïa ki dawai powder bad ki dawai um ki la don ha katei ka jaka sumar.
Ha kajuh ka por la ïoh ban leit ïakynduh ïa u bah Fillingstar John Lyngkhoi Superintendent uba dei ruh u secretary jong ka Synjuk Ki Nongai dawai Khasi Nylla Nongstoiñ Block ha kaba u la ïathuh ba naduh ba la plie ïa katei ka jaka sumar kam shym pat la ïaid beit satia namar ki don katto katne ki jingeh ba ka synjuk ka ïakynduh hynrei hadien katto katne por ki nongïalam bad ki dkhot jong ka synjuk ki la lah ban pynbeit ïa baroh ki jingeh kumta naduh u bnai Nailur jong u snem ba la dep ka jingsumar ïa kiba pang ba shitom ha katei ka jaka ka la ïaid beit ïaid ryntih bha.
Haba pyrshang ban kylli la ka synjuk ka la don ne em ïa mki tiar ki tar bad ii mashin kiba biang na ka bynta ban tylliat ïa ki kynbat ban shna dawai utei u nongïalam ka synjuk u la ong ba haduh mynta na ka liang ka synjuk kam pat don satia.
U la ong ruh ba ki tiar ki tar na ka bynta ban tylliat ïa ki kynbat ban saiñ dawai ki dei kiba la thied shimet shi met na kabynta ban pyndon kam ha la ki jong ki jong ki jaka ba ki shna dawai. Ha kajuh ka por u la ong ba ïa ki dawai ba ki shna ha la ka jong ka jong ka dukan ruh ki don katto katne kiba man la uwei pa uwei u dkhot uba don ha ka synjuk u hap ban pynpoi haka jaka sumar ha Sohpian.
Haba kylli ba haduh katno tylli ki dukan ai dawai kynbat Khasi ki don hapoh ka district u bah Lynkhoi u la ong ba haduh mynta ym pat lah ban ong namar don napdeng ki dkhot jong ka synjuk kiba don ïa ki dukan dawai kynbat Khasi haman la ki jaka bad ki leit ban plie tang ha ki sngi ba long ïew bad don ruh kiba buh dukan ha Nongstoiñ bad ki shong baroh shi snem lynter. Ha kaba ïadei bad ka jingpynkhlaiñ ïa ka jingsumar nongpang da ki dawai kynbat Khasi nylla u bah Lyngkhoi u la ong ba ka synjuk ka don ïa ka thong ban buh ïa ki jaka sumar ha man la ki district bad mynta ka synjuk ka dang ïaleh ban thaw ki lad ki lynti ban ïoh jingïarap na ka sorkar na ka bynta ban pynkhlaiñ shuh shuh ïaka rukom sumar da ki dawai kynbat bad kum u nongïalam jong ka synjuk u la pyrshang ban plie kawei ka dukan ha Shillong ha jan ka jaka ïng ki kali Nongstoiñ bad ïa katei ka dukan u dang dshu plie dang ha kine ki taïew ba la dep bad u don ruh ka jingangnud ban nang pynbha shuh shuh ïa ka rukom sumar da ki dawai kynbat Khasi nylla ha kylleng ki jaka hapoh ka jylla.