Nongpoh, Lber 02: Kumba 78 ngut ki samla kila pyndep ïaka jinghikai ba 7 sngi halor kumno ban ïada haka por ba wan ka jingshah lynshop mariang kiba dei ruh ki kynhun ba 3 hapoh ka Yuva Aapda Mitra Volunteers Training Programme bala pynlong da ka DDMA, Ri-Bhoi District ha Ri-Bhoi College lyngba ka Yuva Aapda Mitra Scheme.
Kitei ki 78 ngut ki samla ki dei ki samla pule jong ki college bapher bapher ha Ri-Bhoi District, bad ha kitei ki 7 sngi kitei ki samla kila ioh ïaka jinghikai kaba janai bad ban ïarap ha ka por ba jia ki jingshah lynshop ha ka mariang bad ki jingjia ba kyrkieh naki ophisar jong ka tnad Disaster Management kum haka por ba khie jumai, shlei um, bad kiwei kiwei ki jingshah lynshop ba khlem poi pyrkhat, kumno ban ai ka jingïarap ha kum katei ka por.
Ïa kitei ki samla bala pyndep jinghikai la pynkup burom ruh da ki syrnod bad khusnam haka prokram pynkut kaba la long haka 27 tarik Rymphang haka jingsakhi lang ka kong Balakyntiew Ranee ADC ka Ri-Bhoi District, ka Dr E Kharkongor Principal ka RI-bhoi College, Bah J Mawthoh District Disaster Management Officer ka Ri-Bhoi, Bah BK Swer Deputy Controller ka Civil Defence Nongpoh bad kiwei kiwei ki ophisar ka district.
