Seisoh ka sienjam ba nyngkong jong ka M’laya Thang-Ta State Level Championship; Rah nam lahduh ka East Khasi Hills

SHILLONG, Lber 02: Ka kynhun ki nongïalehkai jong ka East Khasi Hills ka la ïoh ban rah ïa ka nam lahduh ha ka 1st Meghalaya Thang-Ta State Level Championship 2026.
kane ka championship ka la long ar sngi lynter hapoh ka jingpeit jong ka Meghalaya Thang-Ta Association, bad la pynlong ïa ka ha Smit Indoor Hall, Shillong naduh ka 27 bad 28 tarik Rymphang, 2026. Nalor ka East Khasi Hills, ka Ri-Bhoi ka la pyndep ha ka kyrdan ba ar (1st Runner-up) katba ka West Khasi Hills District ka la wan kyrdan ba lai.
Kane ka lympung ka la pynïasoh lang ïa ki nongïalehkai ba don sap na ki District bapher bapher ha kylleng ka jylla Meghalaya, ha kaba baroh ki la pynkhreh ban ïakhun bad pyni ïa ka jingtbit, ka jinglong ryntih, bad ka jingaiti lut ha ka jingïalehkai tynrai jong ka Thang-Ta.
Ka Thang-Ta, ka dei ka jingïalehkai Martial art kaba mih na Manipur, kaba kynthup lang ïa ki buit ïalehkai daki tiar bad ki buit ïakhun khlem tiar bad ka don ïa ka tynrai ha ka kolshor jong ka thaiñ shatei lammihngi jong ka Ri India.
Kane ka jingïakob ka thmu ban kyntiew ïa kane ka jingïalehkai tynrai hapdeng ki samla bad ban pynshlur ïa ka jingïashim bynta kaba kham bun ha ka kyrdan jong ki distrik, ki jylla, bad ka ri.
Ha ka sngi pynhap pyrda la wan kongsan da u Felix S Khonglam ha ka jingïadonlang u Ronie Ranee (President HNPF) kum u symbud kongsan.
Haba ai jingkren u bah Felix S Khonglam u la ban jur ïa ka jingdonkam ban pynneh pynsah ïa ki jingïalehkai tynrai bad pynpaw ïa ka bynta jong ka jingïalehkai martial arts ban pynroi ïa ka jinglong ryntih, ka jingkoit jingkhiah, bad ka jingsngew sarong ïa ka kolshor hapdeng ki samla.
Katba na ka liang jong u bah Ronie Ranee (President HNPF) u la pynshlur ïa ki nongïalehkai ban leh bha bad bynta ïa ka por jong ki na ka bynta ka pule & kilanmet bad ban kiar na ka shongkha khynnah kaba la pynsniew ïa kiba bun ki jingim samla ha ka jylla, bad ai mynsiem ruh ïa ki ba kin trei shitom ban poi sha ka kyrdan kaba ha khlieh duh ha ka jingïaid lynti jong ki ban wanrah nam bad burom ïa ka jylla Meghalaya.
U la ai ka jingïaroh ïa u Myntri Rangbah ka Jylla u Conrad Sangma ha kaba ïadei bad ka Sport Policy kaba la ai jingmyntoi ïa ki nongïalehkai jong ka Jylla Meghalaya.
Haba phai sha kane ka championship, ki nongïashim bynta ki la ïakhun ha ki kyrdan bapher bapher, kynthup ïa ka jingïalehkai tynrai jong ka Thang-Ta (da kaba pyndonkam da ki wait bad u sum), ka jingïakhun khlem tiar (Sarit-Sarak) lem bad ka demonstration event.
Haba kren ha kane ka sngi, u bah Lamphrang Buhphang, President ka Meghalaya Thang-Ta Association u la ong, “Kane ka lympung ka dei ka sienjam kaba kongsan ban tei ïa ka nongrim jong ka jingïalehkai Thang-Ta ha ka jylla Meghalaya. Ka thong jong ngi ka long ban sei ïa ki sap kiba don jingkyrmen kiba lah ban mihkhmat ïa ka jylla ha ki lympung ïalehkai jong ka ri bad ban wanrah ïa ka burom sha ka Jylla Meghalaya.”
U Chairman ka MSMA, u bah D.R.Ranee (u nongseng ïa ka Thang-Ta ha ka Jylla) u la kdew ba kane ka jingïalehkai tynrai ka la dep shah kynthup lang hapoh ka Khelo India School Games Federation of India & All India University ka ban ai jingmyntoi ïa ki samla ka jylla ha ki snem ban wan.
Kane ka lympung ka la sakhi ïa ka jingïashim bynta ba shitrhem jong ki 70 ngut ki nongïalehkai na ki 3 tylli ki District ka East Khasi, Ri-Bhoi & West Khasi Hills, kaba pynpaw ïa ka jingkiew ka jingsngewtynnad ha ka kam ïalehkai martial arts ha kylleng ka jylla.