Jowai, Lber 02: Ka lympung ïalehkai “First Warjaiñtia Junior Football Championship Under-16 Pamtbuh 2025” bala pynïaid da ka Sports and Youth Sub Committee ka WjSU kala jam sha ka jingïakhun Final ka ban long haka 06 tarik u Lber, 2026 sngi Thohdieng ha madan phutbol ka Pamtbuh, Amlarem Civil Sub-Division.
Ka jingïaknieh nam lahduh kan long hapdeng ka Raising Star FC Mosakhia pyrshah ïa ka Twah-u-sdiah United. Ka jingïakhun kan long haka por 1 baje shiteng nohphai sngi.
Na ka liang ka Sports and Youth Sub Committee kala pyntip paidbah ha ka sngi pynhap pyrda ïa ka “First Warjaiñtia Junior Championships Under 16: Pamtbuh 2025”, u ma K.Passah uba dei District Sport Office, West Jaiñtia Hills District Jowai un long kum u Kongsan, ha ka jingdonlang u bah Bankit Pakyntein COA ka Langsning FC, Shillong, Meghalaya, bah Chirup Pamthied Former General secretary ka ASSA bad uba long ruh Principal Adventist Higher Secondary School Khliehtyrshi West Jaiñtia Hills.
Ka Sports & Youth Sub Committee ka kyrpang ïa ki paidbah ka thaiñ War Jaiñtia bad kylleng ka bri Hynñiewtrep baroh kawei kiba ieit phutbol ba kin wan ban ai jingkyrshan ha katei ka sngi Final khnang ba ka jingïakhun kan long kaba itynnad bad kaba shongkun.
Kum ka jingpynkynmaw, ka seng kala pynlong ïa kane ka Under-16 kum shi bynta ban kyntiew ïa ka football hapoh ka thaiñ War Jaiñtia. La pyntip ruh ha manla ki match jong kane ka tournament ka Sports & Youths Sub Committee ka la peit pyrman ïa ki nongïalehkai kiba don shisha ka sap ka phong bad ha kane ka sngi pynhap pyrda yn pynbna ïa ka kyrteng jong ki bad hadien yn phah pyntbit ïa ki ba kin jam sha uwei pat u pud jong ka jingïalehkai football ha ka jingim jong ki ban wanrah ka nam ka burom ïala ka shnong ka thaw bad ka thaiñ hi baroh kawei. Kane ka long katkum ka kyrwoh na u Deilang Syad uba dei u Sports and Youth Secretary ka WjSU Central Body, Amlarem.
