Mad jingeh ki paidbah bad khynnah skul ha Umling, mih ki dkhot ka RBYF ban maramot ïa u surok

Nongpoh, Lber 01: Hadien ka jingmad jingeh bad ka jingmynsaw jong katto katne ki khynnah skul namar ka jingsniew palat jong u surok, ka Ri-Bhoi Youth Federation (RBYF) ha ka 28 tarik u Rymphang ka la mih shakhmat ban maramot ïa u surok ba la jot rathai ha shnong Umling, u ba pynïasoh sha ka skul St. Francis D’Assisi Secondary School.
Ïa kane ka sienjam la shim da ki dkhot jong ka RBYF na Nongpoh Circle, Byrnihat Circle, 20 Mer Circle bad ka Umling Unit, kiba la trei shitom ban theh maw bad pyndap ïa ki bynta ba sniew jong u surok, khnang ba ki paidbah bad khamtam ki khynnah skul kin ïoh ban leit bad wan da ka jingshngaiñ.
Haba kren sha ki lad pathai khubor, u Samla Rocklin Marbaniang, President ka Umling Unit, u la ong ba ka seng ka dap da ka jingsngewkhia kaba jur halor ka jinglong jingman jong utei u surok, uba la buh jingma ïa kiba ju pyndonkam ïa u man ka sngi.U la pynkynmaw ruh ba ha kine ki khyndiat sngi ba la dep, ki la don ki jingmynsaw jong ki khynnah skul kiba leit da ka scooty namar ka jingsniew palat jong u surok.
Halor kane ka nongrim, ka RBYF ka la shim ïa ka sienjam maramot katba lah ka bor, na ka bynta ka jingsuk bad ka jingshngaiñ jong ki paidbah. Ha kajuh ka por, ka seng ka la kyntu ïa u nongmihkhmat ka thaiñ bad ïa ka sorkar ba kin phai khmat kyrpang bad pynioh skhim maramot pura ïa utei u surok, khnang ba un long uba biang bad uba shngaiñ na ka bynta ki khynnah skul bad ka shnong hi baroh kawei.