Ka ïew ba shisien shibnai ka long kum ka rynsan bad plie lad ha ka ïoh ka kot ki nongrep

Shillong, Lber 01: Ka ïew ki nongrep kaba la tip kum ka ïew ba shi sien ha ka shi bnai kaba la pynlong ha ka wat kaba ar, kala long shisha ka ba ai jingmyntoi ïa ki nongrep kiba la wan ban ïa shim bynta ha kane ka ïew bad kaba la plie lad ruh ha ki ban kyntiew ha ka ïoh ka kot lyngba ki mar ba kila wanrah ban die ha kane ka ïew.
Ïa kane ka ïew la pynlong ha ka jaka pynïeng kali jong ka ophis Directorate of Fisheries kaba don mar pyrshah bad ka St Edmund College, Shillong ha ka sngi Saitjain.Ïa kane ka ïew ba shisien ha ka shi bnai la pynlong da ka 1917 iTEAMS hapoh ka tnad Agriculture & Farmers’ Welfare bad ba la kyrshan da ka Meghalaya Farmers’ Empowerment Commission (MFEC).
Ha kane ka sien kaba ar ba la pynlong ïa kane ka ïew kaba shisien ha ka shi bnai ïa kaba la tip ruh kum ka Monthly Framers Market, ka jingdon jong ki stall ne ki dukan ki don kumba 32 tylli ha kaba ki nongrep na ki lai tylli ki District ki la wan ba kynthup na East Khasi Hills District, West Jaintia Hills District bad na Ri Bhoi District.
Ïa kane ka ïew la sdang ha ka por 9.30 mynstep bad la pynkut noh ha ka por 4 baje janmiet.Ki marrep kiba kham thnem bha ha kane ka ïew kidei u Soh Strawberry, ka pylleng saw, u Soh niamtra, ki Kharang bad kiwei kiwei de kiba lut kloi na baroh namar ka jingïa knieh ki paidbah kiba wan ha kane ka ïew.
Kiwei de ki mar rep ba ki nongrep ki wanrah ha kane ka ïew ki kynthup ïa u Sohmarit, ki jingtah jingber haba shet jingshet (spices) kiba bun jait, u syieng, u shynrai, u sla tyrpad, ka umngap, ki shriew, sohtrun, u krai, ki tyndong siej, khaw khasi, u shira, u khaw ja shulia, soh pyrshong, ki pathaw, u tit, u soh broi, ki tung rymbai Jowai bad Dawki, u sohdarnei bad kiwei kiwei de ki jhur kiba khlem pyndonkam dawai kiba dei ki mar rep kiba mih na ka thain.
Ha kane ka sngi la sakhi ruh ba ki nongrep na Ri Bhoi kiba la wanrah ruh ïa ki syiar kiba la tip kyrteng kum ki Kadhanath, Guinea, ki Quial bad ki Salonghi bad ïa kine la die ha ka dor kaba bit kumba die ha ïew.
Haba ïa kren bad ka kong kaba wan Thangbuli, West Jaintia Hills District kala ïathuh ba kadei ka sien ba nyngkong ban wan ha kane ka ïew ki nongrep bad ka wanrah ïa ki kharang kiba dei ki dohkha ba shu syang bad kala ïathuh ba ka lah bha ban die.
Ha kaba ïadei bad ka dor ka mur, “kane ka longkmie kala ïathuh ba ka die kumba ka ju die ha ïew Jowai bad ki don ha la ki jong ki jong ki dor kiba T. 250, 300 bad 350” kala ong bad bynrap ruh “Ka wanrah 30 kilo ki kharang bad ka lah die bha ïa kine ki kharang ba ka wanrah bad shwa ban kut ka por kala dep ban die lut baroh” kala ong.
Ka kong Stialinda Khasain, kaba dei ka nongrep Nongwah, Tyrsad, kala ong ba kane ka jingpynlong ïa ka ïew jong ki nongrep ka la long shisha kaba ai jingmyntoi na ka bynta ban pynkhlain ïa ki kam jong ki nongrep. U Bah Persevere Rani, uwei pat u nongrep na Jirang, Ri Bhoi, u la batai ïa kane ka ïew kum ka rynsan kaba kongsan bad pynpaw ruh ïa ka jingkmen halor ka jingioh ïa ka jingkynthoh kaba bha na ki nongthied.
Na ka liang ki bor kiba pynïaid ïa kane ka ïew kaba ar ne ka (February Second Edition) kila ïathuh ba kane ka ïew ka kham heh bad thnem bha ban ïa ka (January Edition) kaba pynlong ha ka sien ba nyngkong eh bad kila ïathuh ruh ba ka jingpoi jong ki briew kiba ha kane ka ïew kila jan kot sha ka shih ajar ngut.
Ka jylla Meghalaya kumba long mynta ka la lah ban pynmih kumba 1,200 metric tonnes u strawberry man la u snem, bad ka jingkiew ki nongrep kala poi saha ki 250 ki shnong bad kaba la ai jingmyntoi ïa ki 4,000 ngut ki nongrep.
Ha kaba ïadei bad u Sohmarit, ka jylla la lah pynmih kumba 2,000 metric tonnes ha kylleng ki jaka kaba la kot haduh 2,083 hectares, bad kane kala iarap ïa palat 2,600 ki nongrep.
Kaba pyn sngewtynnad bad ka jingbym byrnia ïa ki nongthied nongpet kadei lyngba ki jingrwai ba la rwai da ki kaitor kiba la ïoh jingïarap na ka Chief Minister’s Meghalaya Grassroots Music Program (CM-MGMP).
Ha kaba ïadei bad kane ka ïew u dak jingkylli uba mih kadei, balei kiwei ki district kum ka West Khasi Hills District, ka South West Khasi Hills District, ka Easter West Khasi Hills District, ka East Jaintia Hills District bad ki District na ri lum Garo ki khlem wan ban ïa shim bynta ha kane ka ïew ba shisien shi bnai ne ka Monthly Framers Market.