Khliehriat Lber 01: U nongialam uba dei u President jong ka Jaiñtia National Council (JNC), u bah Sambormi Lyngdoh haba kren sha ki pathai khubor, u la pynpaw ka jingbym sngewtynnad halor ka jingkren laplah jong uwei na ki dkhot jong ka BJP, u Sunil Deodhar uba la kynthoh byndei ïa ka niam kristan ha kaba u la kynthoh pyrshah ïa ki kristan ha kawei ka jingialang kaba ha ri lum khasi.
Kum ka jingpynshai sha u dkhot ka BJP uba la kren kynthoh ïa ki kristan na ka liang u bah Sambormi Lyngdoh u la ong “Kum ki kristan ngi ngeit ba u Blei u long ka jingieid, u Blei u long u nongbuh nongthaw bad ngi ngeit ha u Jisu krist bad u Blei u ai ha ngi ha mon kaba laitluid kumta ym don mano mano ba pynbor ïa ngi ban long kristan hybrei da ka mon la jong ngi long kristan., ngi ki kristan ngi burom ïa kiwei ki jait niam ruh bad ngi khmihlynti ba kiwei ruh kin burom, haba ngi kren shaphang ka jinglong kristan ngi thmu ïa ka jinglong mynsiem tang namar ba ngi dei ki kristan kam mut pat ba ngim dei ki nong India” ong u bah Sambormi Lyngdoh.
Shuh shuh u la kynthoh jur ruh ïa utei u nongialam ka BJP ba um dei ban pynshitom ïa ki kristan namar u Jisu u khlem phah ïa kino kino ki shipai ban iakhun pyrshah hynrei u phah ïa ki nongialap… “ngi dei ki nongshong shnong ha kane ka pyrthei bad ngi dei ruh ki nong India kumta ym dei ban shu kyntait noh ïa ngi tang namar ba ngi dei ki kristan, hapoh ka ri India la synshar ïa ngi da ka juh ka aiñ bad ngi ioh ïa ki juh ki hok” la bynrap u bah Sambormi.
Haba kren halor ka jingkynthoh u dkhot ka BJP pyrshah ïa ki kristan, u bah Sambormi Lyngdoh u la pynphai ïa ka jingmut sha ka ktien ka jong u Blei ha kaba u apostole Paul ha ka por ba u dang khot ïa u da u Saul u la pynshitom beiñ ïa ki kristan bad ynda u la iashem ïa u Jisu u kylla kaba mut bad kylla long u apostle ne u nongialap, u kyntu ruh ia utei u dkhot ka BJP ba u dei ban ailad ba ki kristan kin im suk im saiñ bad ym dei ban pynpait pynpra ïa ka jingngeit kristan namar ki kristan ki dei kiba ngeit ha u Jisu uba dei u Blei uba im bad ym don ba lah ban leit sha bneng lada khlem pdiang ïa u Jisu.
Utei u nongialam jong ka Jaiñtia National Council, u la ong ruh ba haba kren shaphang ka ri u la ong ba ngi dei ban don ka jingiatylli ym tang lyngba kawei ka niam hynrei lyngba ki niam bapher bapher da kaba ïa burom iwei ia iwei, u la ong ruh ba kum ka seng kam pyrshah ïa kano kano ka niam bad kyntu ruh ba ym dei ban shu peit khmat tang ïa ka niam kristan, u phah ruh ia ka khubor kaba shai sha utei u dkhot ka BJP ba u dei ban da pyrkhat ar sien namar haba kren pyrshah ïa ki kristan ka mut ba u kren pyrshah ïa u Blei ba ki kristan ki mane bad kaei kaba ngi tip ba kum ki kristan ngi dei ban don ka jingngeit namar ka hima ka jong u Trai kam dei ha kane ka pyrthei bad katkum ka ktien u Blei la hikai ban ïa ieid iwei ia iwei bad ban ieid wat ïa kita kiba shun ïa ngi.
Na ka liang ka JNC ka kyntu ruh ïa ki pathai khubor ba kin pynsaphriang ïa kane ka khubor ba kiwei kin sngewthuh ba ki kristan kim long satia ka jingma ïa ka pyrthei.
