Nongpoh, Lber 01: Ha ka sien kaba nyngkong eh, ka kynhun Meghalaya AutoCross Drivers (MAD) ka la lah ban pynlong ïa ka lympung jingïakop ñiah kali kaba la tip kum ka 1st AutoCross Sprint Challenge ha Madan Kurkalang. Ïa kane ka jingïalehkai la sdang naduh ka 27 tarik bad la pynhap pyrda ha ka 28 tarik u Rymphang, hapdeng ka jingiphuh iphieng bad ka jingïashim bynta kaba shitrhem ki nongñiah kali na kylleng ka jylla bad nabar.
Ïa kane ka kynhun bad ka lympung ïakop ñiah kali la ïalam da u Samla Jeffrey Jyrwa kum u President, ryngkat ka jingïatreilang bad u Samla Osbert Wilfred Rynjah kum u Working President, u Samla Terrence Mawlong kum u Secretary bad u Samla Hamon Mewan Kharlukhi kum u Organising Secretary, lem bad kiwei pat ki dkhot kiba la trei shitom ban pynurlong ïa kane ka lympung
Kane ka lympung kam shym la dei tang ïaki nongñiah kali na Meghalaya, hynrei ka la khring ruh ïa ki nongïashim bynta na ki jylla ba marjan kum na Nagaland bad Mizoram ha kaba haduh 46 ngut ki nongñiah kali, kynthei bad shynrang, kiba la wan ban aireng bad pyni ïa la ki sap ha kane ka rynsan.
Haba kren halor ka thong jong ka kynhun, u Samla Jeffrey Jyrwa kum u president u la ong ba ka MAD ka angnud ban kyntiew ïa ka motorsport ha ka jylla bad ban thaw lad ïa ki samla kiba don sap ba kin ïoh ïa ka rynsan ban pyni ïa la ki jinglah ha ka jingïalehkai ñiah kali. U la kdew ruh ba bun na kum kine ki jingïakop ki ju long shabar jylla, kaba buh jingeh ïa ki samla kiba don jingieid ïa kane ka jingïalehkai ban leit shim bynta namar ba bun ka jinglut.
Namarkata, ka kynhun ka la shim ïa ka sienjam ban wanrah ïa kane ka lympung hapoh jylla hi, khnang ba ki samla kin ïoh lad ban ïashim bynta khlem jingeh. Shuh shuh, u la pynpaw ba ka Meghalaya AutoCross Drivers ka don ka jingthmu ban pynlong ïa kane ka jingïakop man la u snem ban kyntiew shuh shuh ïa ka jingïalehkai motorsport ha ka jylla Meghalaya.
Ha katei ka sngi la sam ruh da ki khusnam sha ki nongjop ha katei ka jingïakop kum ka jingai mynsiem ba kin dang bteng ban lehbha namar kane ka rynsan la rai ban pynlong man u snem.
