Ïasoi MoU ka S&E bad ka Angie Shirhabs ban shna ashar doh syiar ba ai kyrteng ‘Hoi Kiw’

Shillong, Rymphang 28: Ha ka bynta kaba kongsan na ka bynta ka jingroi jong ka food processing sector ha Meghalaya, ka S&E Ventures ka la ïasoi ïa ka Contract Manufacturing Agreement bad ka Angie Shirhabs, ka food startup kaba la ioh jingkyrshan na Prime Meghalaya, ban pynlong contract manufacturing ïa ka doh syiar ashar kiba la song kyrpang.
Kane ka jingiasoi ka pynskhem ïa ka jingïatreilang ban shna ïa ka doh syiar ashar kaba khuid, ka jingbha bad kaba lah ban die ha ka jylla bad shabar jylla ruh kumjuh.
Ïa kane ka doh syiar yn die hapoh ka brand “Hoi Kiw,” bad kane ka brad ka thmu ban pynneh pynsah ïa ki jingbam tynrai katba ka bud ryntih ia ki kyndon ai jingïada bam.
Katkum ka jingïateh kular, ka Angie Shirhabs kan shimti ïa ka bynta shna, da kaba bud ïa ka recipe ba kyrpang, ki kyndon jingbha, ka rukom song bad ki kyndon ai jingïada bam ba la buh da ka S&E Ventures. Ka brand owner kan peit ïa ka branding, ka marketing bad ka distribution ban pynlong ïa ka kum ka mar bam kaba kyrpang ha ka iew.
Ha ka iew mynta, bun na ki ashar ki dei kiba ym don license ne ki bym bud ia ki kyndon FSSAI. Hynrei, ka “Hoi Kiw” chicken pickle kan long kaba la bud pura ïa ki kyndon FSSAI, kaba la shna ha ka jaka kaba khuid bad kaba bud ryntih ia ki kyndon shnong bad ri, ban pynthikna ba ka dei kaba shngain bad kaba lah ban bam da baroh.
Kumba ka startup kaba la kyrshan da Prime Meghalaya, ka Angie Shirhabs ka la ioh jinghikai, jingpynroi bad jingkyrshan ban kyntiew ia ka rukom shna katkum ki kyndon ai jingïada bam.
Kine ki ar liang ki la ban jur halor ka jingbud ryntih ia ki kyndon FSSAI, ka jingkhuid bad ka jingpeit bniah ïa ka jingbha jong ka mar bam.Ka jingthmu ka long ban pynthikna ïa ka jingneh ka jingsma, ka jinglah ban neh slem bad ka jingshaniah ki nongthied.
U nongmih khmat ka S&E Venture u la ong ba kane ka jingïatreilang ka ïahap bad ka jingthmu jong ka company ban pyndonkam ïa ki sap ki phnong ban shna ïa ki mar bam kiba don jinglong tynrai hynrei kiba bud pura ïa ki kyndon ai jingïada bam.
Ki nongmih khmat ka Angie Shirhabs ki la pynpaw ba kane ka MoU kan ïarap ban kyntiew ïa ka jinglah shna, ban pynkhlain ïa ka brand bad ban thaw kam ha ka jylla.
Ka jingshna ba nyngkong hapoh kane ka jingiasou MoU la khmih lynti ban sdang shen, kaba pyni ïa ka jingsdang jong ka jingïatreilang kaba neh bad kaba don ka jingkyrmen hapdeng ka S&E Ventures bad Angie Shirhabs.