Khang ki nongñiah auto ïa ka kali UBER ban rung sha skulbah USTM, Ri Bhoi District

Nongpoh, Rymphang 27: Kawei ka nongtrei jong ka University of Science and Technology Meghalaya (USTM) kaba la tip kyrteng kum ka Julee Bezbaruah, ka la ujor ejahar sha ki pulit ka Jorabat Police Outpost hadien ba ka kali UBER kaba ka la book ban leit trei, ka la shah khang ha ki katto katne ki nongñiah Auto Rickshaw ha surok Killing.
Katkum ka jingïoh lum jingtip, kane ka jingjia ka la jia hynnin ka sngi haba katei ka nongtrei ka dang leit sha ka jaka trei ha USTM kaba don ha Jorpul Killing bad haba katei ka kali UBER ka poi ha ki bynta ban kiew sha ka skulbah, ki nongñiah Auto Rickshaw ki la pynsangeh ïa ka kali bad kim shym la ailad ba kan ïaid shakhmat.
Na kane ka jingleh, katei ka nongtrei ka la duh leit trei ha katei ka sngi bad ka la rai ban ujor ejahar sha ki pulit, ka Jorabat Police Outpost.
Hadien ka jingujor, la ïoh jingtip ba ki pulit ki la khot ïa ki nongïalam jong ka kynhun nongñiah Auto Rickshaw ha surok Killing ban ïa kren sngewthuh hynrei na ka liang ki nongñiah Auto, ki la pyni ruh da ka jingthoh ba la mana ïa ki kali UBER ban ïaid sha katei ka jaka, da kaba kdew ba ka lah ban pynduh kamai ïa ki lada ailad ïa kine ki kali online ban treikam ha katei ka thaiñ.
Shuh shuh, ki pulit ka Jorabat ki la maham ïa ki nongñiah Auto ba kim dei ban shim ïa ka aiñ ha la ki kti. Lada don kano kano ka jingeh, ki dei ban pyntip sha ki bor pulit lane ujor sha ki ophisar ba dei khmih ka tnad Transport, khnang ban nym mih kano kano ka huri hura kaba ktah ïa ki paidbah.