Kut noh ka NTPC Khelo India North East Zone Open Archery Tournament

Shillong, Rymphang 27: Ka jingangnud jong ka Meghalaya ban ïoh khur shuh shuh ïa ki takma ha ka lympung ïakop siat khnam kaba la tip da ka NTPC Khelo India North East Zone Open Archery Tournament 2026 kam shym la urlong satia hadien ba ka Nakibansharai Khonghat ka la duna tang khyndiat ban ïoh kiew rynsan khur takma rnong ha ka ïakop siat khnam Compound Division jong ki kynthei.
Ka Archery Association of Meghalaya (AAM), hapoh ka jingpeit jong ka Archery Association of India (AAI) ka la pynlong ïa kane ka lympung na ka bynta ka North East Zone ha madan siat khnam ha SAI Training Centre kaba ha NEHU, Shillong.
Hynne ka 27 tarik Rymphang (sngi Thohdieng) ka dei ka sngi kaba khadduh, ha kaba ka Meghalaya ka la pyndep ïa ka lympung da kaba khur kawei ka takma ksiar lyngba u Devraj Mohapatra, kawei ka rnong lyngba u Vivek Sunar uba la ïakhun pyrshah ïa u Hypormi Wanniang ha ka sngi sdang hynnin ka sngi ha ka Recurve Division.
Ka Manipur ka la synshar hi marwei ïa baroh ki takma ha ka Compound Division jong ki shynrang hynne ka sngi – u Huidrom Biken Singh (takma ksiar, 147 poiñ), u Hawaibam Teuton Khuman (takma rupa, 141 poiñ) bad u Ngasepam Nabadwip Singh (takma rnong-148 poiñ). U I Jagjeet Singh na Assam u la wan kyrdan ba saw (145 poiñ).
Na Meghalaya dei tang ka Nakibansharai kaba la poi sha ka semifinal hynne ka sngi. Watla kam shym la lah ban poi sha ka phainal, hynrei ka dang don ha ka jingïakhun ban ïaknieh kyrdan ba lai na ka bynta ka takma rnong. Ka la siat bha bad lamkhmat ïa ka Smriti Sarma ka Assam hynrei ka jingbakla ha ka jingpyrshang siat ba khatduh ka la pynlong ïa ka nongïakhun pyrshah ban tam da 144 poiñ la 141 poiñ. Ka jingïakhun ïa ka nam lahduh la jop da ka Anuradha Boruah ka Assam da 147 poiñ, ha kaba ka Ksh Manglemsana jong ka Manipur ka la wan ba-ar da 140 poiñ.
Ha kane ka sngi ba khatdih la wan kongsan da u Director ka tnad ïalehkai u Dikki D Shira, ha ka jingïadon lang ka nongïalehkai Olympic bad ka nongïoh khusnam Arjuna ka Chekrovolu Swuro, kaba dei ruh ka President jong ka Nagaland Archery Association bad ka AAI Vice-President.
La ïoh ban sam khusnam pisa sha ki saw ngut kiba la pyndep hakhmat na kawei pa kawei ka jingïakop – Rs.20,000 na ka bynta ki nongjop, Rs.15,000 na ka bynta kiba wan ba-ar, Rs.10,000 na ka bynta ki nongjop takma rnong bad T.5,000 na ka bynta kiba pyndep ha ka kyrdan ba saw.
Kane ka dei ka sien kaba lai lynter ba ka AAI ka pynlong ïa kane ka lympung. La pynlong ïa ka ha kylleng ki san tylli ki zone, kane ka lympung ka dang bteng ban shakri kum ka rynsan ban pynroi, pynpaw pyrthei bad ban pynkhlaiñ ïa ka jingïashim bynta na ki synjuk siat khnam jong ki jylla, ki board ïalehkai bad ki dkhot ba ïatreilang.
Ka jingkyrshan ba la ai da ka NTPC bad ka SAI ka long kaba kordor bad ka pyni ia ka jingangnud jong ki ban kyntiew ïa ka jingïakopsiat khnam ha ka ri, kaba ym tang ba kan kyntiew ïa ka jinglong bad jingheh jong ki lympung siat khnam hynrei kan ai ruh ïa ka rynsan kaba kham khraw ïa ki nongsiat khnam jong ka ri India ban pynbha ïa ka jinglehkai bad ban kham pyntbit shuh shuh ïa lade.