SHILLONG, Rymphang 19: Ka Sporting Cricket Club ka la pynliem noh da 5 wiket ïa ka Young Guns Cricket Club ha ka jingïalehkai jong ka lympung Shillong Cricket League Super Division 2026 ba la pynïaid da ka Shillong Cricket Association (SCA), kaba la long hynne ka sngi Palei (19 tarik Rymphang).
Ka Young Guns CC ka la rai ban tied nyngkong hadien ba jop ïa ka jingkynting pisa (toss), hynrei ka la shah pynkhyllem noh baroh shiphew (10) wiket na ka bynta 117 ron haki 29.1 ober. Kiba la pawkhmat ha ka tied ki long u Manthan Dey (27 ron naki 35 bol) bad u Angkit Tamang (24 ron naki 38 bol).
Napdeng ki nongkawang bol jong ka Sporting CC, u Sachin Kumar u la khur 3/11 naki 9 ober, katba u Purav Agarwal u la khur 3/8 naki 5.1 ober.
Haba beh ïa ka thong, ka Sporting CC ka la hap 5 wiket hynrei ka la ïohlad ban kamai 120 ron haki 17.5 ober. Kiba la lamkhmat ha ka tied ki long u Rohit Kumar Yadav (39 ron naki 33 bol) bad u Avinash Rai (33 ron naki 42 bol).
Na ka liang jong u Grish Raj Ray (5 ober: ailad 27 ron) bad u Mewankitbok Kharpuri (6 ober: ailad 36 ron), nongkawang bol jong ka Young Guns CC, ki la ïoh ban khur mar 2 wiket, hynrei kim shym la lah pat ban khanglad pura ïa ki nongtied ka liang pyrshah.
Ha kaba kut jong ka jingïalehkai, u Sachin Kumar u la ïoh ban khur ïa ka khusnam Player of the Match.
Da kane ka jingjop ka Sporting CC ka la jam sha ka kyrdan ba ar ha ka Group B da kaba jop lai sien bad shah rem shi sien hadien 4 tylli ki jingïakhun, katba na ka bynta ka Young Guns CC, kane kadei ka namrem kaba lai sien lynter hadien lai tylli ki jingïakhun.
