Donkam kum ka Permit ïa ki bar-ri shwa ban rung sha ka jylla : Conrad

Shillong, Rymphang 18 : U Myntri Rangbah ka Jylla Conrad K Sangma u la pyntip ha Iing Dorbar ba ka sorkar jylla ka dang bishar bniah bad peit sani bha halor ka Immigration and Foreigners’ Act, 2025, ha shwa ba kin syllok pat bad ki paidbah.
“Ki paidbah bad ka sorkar ka sngewkhia bha bad dei na kane ka daw la pyrshang ban pyntreikam ïa ki kyndon ain ban lah tehlakam bad pynsangeh ïa ka jingrung kyrthlep ki mynder, ngi don ka MRSSA ba ngi pyntrei, kumjuh ruh bun ki briew ki ong ba donkam da ka ain kaba kham khlain. Dei na kata ka daw ngi tyrwa da ka ILP bad mynta ka don ha ka sorkar India,” u la ong haba jubab ha Iing Dorbar halor ka jingkylli ba wanrah da u MLA ka Sohiong, Bah Synshar Lyngdoh Thabah.
Shuh shuh u ong ba ka thong hi ka long ban ïada ïa ki briew lajong bad ban khanglad ïa ki mynder ban rung suk sha ka jylla.
“Ngi kwah ban don ïa ka jingtreikam kaba donkam ban don kum ka permit ïa ki briew kiba rung shapoh ka jylla, kata ba kito kiba wan kin hap ban da ïoh jingbit (Permit) shwa ba kin rung sha ka jylla katba ngi dang ïakhun ban ïoh ïa ka ILP. Ngi la kynduh ruh ïa u Myntri Kampohiing bad kumta ka dei ka kamram ruh jong ka sorkar jylla ban wad ïa ki lad ki lynti ban ïoh ïa ki lada jingïada kum ka ILP,” bynrap biang u Myntri Rangbah.
Haba jubab halor ka jingkylli lada pyntrei kam ïa katei ka ain kane kan ktah neem pat ïa ka bor treikam jong ka Khyrnit ba Hynriew, u Myntri Rangbah u la ong ba kane kan ym don jingktah ei ei lane ba kan tuklar ïa ka Khyrnit kaba Hynriew.
U Myntri Rangbah haba pynshai bniah shuh shuh halor ka Immigration and Foreigners Act, 2025, u la ong ruh ba ha ki jylla ba katei ka ain ka la treikam, ki briew kiba nabar kin hap ban ïoh ïa ka Permit shwa ban rung.
Halor ka jingkylli ba wanrah da u Bah Paul Lyngdoh, u Myntri Rangbah u la ong ba kad Sorkar India ka dei ka bor ban peit kano ka thain lane kano ka jylla kaba dei ban shah kynthup ha ka Protected Area.
Haba juba pat halor ka jingkylli ba wanrah da u Nongïalam ka Liang Pyrshah, Dr. Mukul Sangma na ka liang u Myntri Rangbah u la ong ba haba ki ïohi ïa kane ka ain kum ka sorkar hi ki la bishar bniah bad kumta ki dang wad lad mynta namar ka thong jong ki ka long beit ban ïoh ïa ka jingïada na ka jingwan kyrthlep ki briew kiba nabar.
U ong ruh ba kum ka jylla ki la kynduh bunsien bha bad u Myntri Kampohiing ka Ri namar ka thong ka long ban ïada bad khanglad ïa ka jylla na ka jingrung kyrthlep ki mynder.
Ha kane ka sngi namarba ba ka jingïatai ka la khluit bha, u Lamphang ka Iing Dorbar Thawain ka jylla, Thomas A Sangma u la hap ban tuklar bunsien ban tem ïa ka jingïa kdew kti bad ka jingïahylla katba ka jingïatai ka dang ïaid.
Hadien ba ka Dorbar ka la sdang biang, u Myntri Rangbah u la ong ba kane ka mat ILP kadei kaba baroh naduh ka Liang Pyrshah haduh ka Liang Synshar ki la mynjur lang da ka Resolution ban phah sha ka sorkar Pdeng.
Kumta, u ong ba mynta kam dei tang ban kdew kti ïa ka sorkar hynrei ban mih ban ïakhun lang ban pynurlong ïa kane ka jingdawa.
Ka jingïatai ha ka kynta kylli jingkylli ka la neh tang kawei ka jingkylli naduh kaba sdang bad haduh ba kut ka por bad palat wat ïa ka Kynta kylli jingkylli ruh tad haduh ba u Lamphang u hap ban tuklar bad pyntip ba ka kynta kylli jingkylli ka la kut bad ba kin shong noh.