Pynliem ka Nongmynsong ïa ka Lumpyngngad da 8 wiket ha ka Shillong Cricket League Super Division 2026

SHILLONG, Rymphang 18: Ka Nongmynsong Cricket Club ka la pynliem noh da 8 wiket ïa ka Lumpyngngad Cricket Club ha kawei na ki jingïalehkai jong ka lympung Shillong Cricket League Super Division 2026 ba la pynïaid da ka Shillong Cricket Association, hynne ka sngi Balang.
Ka jingïoh kamai ron ka la long kaba duna bha ha kane ka jingïakhun ha kaba ka Nongmynsong ka la pynkhyllem noh ïa baroh shiphew (10) wiket jong ka Lumpyngngad tang na ka bynta 87 ron haki 16.5 ober, nangta ka la tied pyndep ban kynjoh sha ka thong da kaba hap tang 2 wiket ban khur ïa ka jingjop.
Ha ka pali tied jong ka Lumpyngngad, dei tang u Rahul Shah (16 ron naki 11 bol) bad u Rajib Ray (16 ron naki 23 bol) kiba la kham pawkhmat ha ka tied.
Ki nongkawang bol jong ka Nongmynsong kiba la seisoh bha ki long u Santosh PM (khur 3/8 naki 3 ober) bad u Bibek Poudel (khur 2/0 naka 1 ober).
Ka Nongmynsong ka la hap tang 2 wiket ban kamai 91 ron haki 14.4 ober, bad kiba la lamkhmat ha ka tied ki long u Jaskirat s Sachdeva (30 ron naki 28 bol) bad u Pushkar raj Singh (23 ron naki 24 bol). Ha kaba kut ïa ka khusnam Player of the Match la khur da u Santosh PM.