Da ka Mi-kari festival pynlong ka SWGH ban wanrah ka jingïatylli bad pynneh ïa ka tynrai

Shillong, Rymphang 14 : Ki bor pynïaid distrik jong ka South West Garo Hills ki la pynlong da ka Mi-kari festival kaba arsngi kaba long ha madan Ampati ha ka 14tarik mynta u bnai da ka thong ban wanah ka jingïatylli bad ka jingïatrei lang bad khamtam eh ban pynneh ïa ka tynrai.
Ka thong ba hakhmat eh jong ki bor distrik ka South West Garo Hills ka long ruh ban sei pyrthei ïa ka jinglong tynrai jong ka distrik, nangta ki jingïalehkai tynrai, ki sap kyrpang ba ki nongshong shnong ki don bad khamtam eh ban wanrah ka jingïatylli lang ha ka distrik baroh kawei nalor ba la ailad ïa ki riew donsap, ki nongtrei kam lajong ban pyni ïa ka jingtbit jong ki.
Ha kine ki sngi ki paidbah ki ïoh ruh ïa ka lad ban pyni nam ïa ki syntiew ba mih ha ka thain, ki jingïalehkai tynrai kaba pynim biang ïa ka mynnor lyngba ki jait jingïalehkai bad ka jingïakob pyni khunlung kaba pynshlur ïa ka imlang sahlang ban sumar sumkher ïa ki khun ha ka rukom kaba shait kaba khlain.
Nalorkata, la don ruh ka jingïakob shet lane ka Master Chef Ampati ha kaba ki nongshet na kylleng ka distrik ki wan ban ïakob. La pynshongshit ruh ha kane ka sngi naduh ka jingshad na ka Tura Dance Academykaba la plei lad ïa ki heprit donsap, ka rynsan ka put ka tem na ki samla ka thain ka la nang pynkmen shuh shuh ïa ki nongwan shim bynta.
Ïa kane ka tamasa la wan ban plie pyrda da ki MLA na katei ka thain kynthup ïa u Subir Marak MLA ka Rangsakona, u Sanjay A. Sangma MLA ka Mahendraganj bad ruh u Ian Botham K. Sangma MLA ka Salmanpara.
Na ka liang u Ian Botham ha ka jingkren u la ai ka jingïaroh ïa u Myntri Rangbah ka Jylla Conrad K Sangma uba la bteng ban pynurlong ïa kane ka tamasa ba kan long kaba seisoh bad kaba shitrhem. U ong ruh ba kum kine ki tamasa Mi-Kari ki plie lad ruh ban pyni nam ïa ka jingriewspah ka thain ha baroh ki liang khamtam eh haba ïadei bad ka kolshor bad ka jinglong tynrai.
Na ka liang u Subir Marak pat u la ong ba kum kine ki rynsan ki plie lad ïa ki khun samla ba kin pyni ïa ka sap ba ki don bad kane kan ai mynsiem shuh shuh ïa ki ba kin nang shlur.
Katba na ka liang u Sanjay A. Sangma, u la ai ka jingïaroh ai ki bor distrik kiba la lah ban pynlong ïa kat katei ka lympung kaba heh bad kaba don jingmut. U la ai mynsiem ruh ba kum kine ki lympung dei ban bteng pynlong man la u snem.
Shwa kane pat na ka liang ka Deputy Commissioner ka distrik, ka Anendya Raajshree, IAS ka la pynpaw ka jingsngewnguh ïa ki khlieh nongsynshar, ki nongwan shim bynta bad baroh kiba la don bynta ban pynlong ïa katei ka prokram kaba seisoh.
Ha ka sngi kaba nyngkong la sakhi ruh ïa ka jingsam ïa ki syrnod sha ki samla kiba la pyndep ïa ki jingpyntbit ha ki jait jinghikai bapher bapher jong ka Meghalaya State Skill Development Society.
Ka la don ruh ka jingïakob niah arshaka ha kaba ki dkhot ba pawnam kum ka Black Falcon Riders, Tribal Nation Riders bad A•kawe Riders ki la wan ban shim bynta ban pynphuh shuh shuh ïa katei ka lympung. Kiwei pat ki jingïalehkai tynrai ki kynthup naduh ka Rong•ma kolsusa•a, jakpong pe•a, anding oka bad wapong sika.