Buh thong ka sorkar pdeng ba ha u snem 2047 ka India kan kiew ha baroh ki liang, ong ka BJP

Shillong Rymphang 14: U nongïalam ka BJP u Devesh Kumar uba la wan sha Shillong ban pynshai paidbah haba ïadei bad ka mang tyngka jong u snem 2026- 2027 haba ïadei bad ka jylla Meghalaya bad kumjuh ruh ïa ka dong ka thaiñ shatei lammihngi baroh kawei kaba la mang na ka bynta ki skhim bapher bapher khamtam ha kaba ïadei bad ki lynti synkien, u la banjur ïa ka jingangnud ka sorkar pdeng ka National Democratic Alliance (NDA) hapoh ka jingïalam ka BJP, ban pynïasoh da ki surok babha sha baroh ki jylla kane ka thaiñ.
Haba kren ha ki lad pathai khubor ha ophis jong ka party BJP ula ong ba bun ki jingmyntoi ki paidbah ki la ïoh na ki skhim bapher bapher jong ka sorkar pdeng bad ka sorkar mynta ka dang ïaleh ban pynpoi shuh shuh ïa ki skhim sha ki paidbah nongshong shnong.
Une u nongïalam u la kyntu ïa ki paidbah khamtam kiba wan na ki nongkyndong ba kin aplai ïa ki skhim bapher bapher kiba don khlem da don kano kano ka jingleh shiliang khmat da kaba pynpaw ruh ba u Myntri Rangbahduh jong ka Ri India u Narendra Modi u kham phai khmat eh ban pyndonkam ïa ki kor ki bor ban ai ki jingïarap ba kin poi beit sha ki nongïoh.
Na ka liang u nongïalam ka BJP u la ong ba ka jinglait nangne nangtai (leakage) un nym lah ban pynduh hynrei da kaba pyndonkam ïa ki kor ki bor jong kane ka juk kaba mynta ka la ïarap shibun ïa ka jinglait tuh ki skhim bad ka sorkar pdeng ka la buh ïa ka thong ba ha u snem 2047 ka Ri India kan dei ka ri kaba la kiew ha baroh ki liang.
Ka Shazia Ilmi ka la ong ba ka thaiñ shateilam mihngi jong ka Ri India ka la noh synniang shibun sha ka ïoh ka kot jong ka ri da lai persen bad ha kine ki shiphew snem kane ka dong ka thaiñ ka la sdang kiew hajan baroh ki liang, bad u dak ba paw haba ïadei bad ka roi ka san ka la sdang paw shynna ha ki 85 tylli ki district ha kane ka thaiñ khamtam ha ka liang ki surok, ki jingkieng, ka pule puthi bad ha ki kam jngohkai bad ki jingsengkam lajong.