Lyngba ka Winter School ba 21 sngi angnud ka ICAR ban wanrah ki buit thymmai ïa ki jingthung

Nongpoh, Rymphang 13: Ka Winter School ba 21 sngi ba la kyrshan da ka ICAR halor ka phang “Advances in Cutting-Edge Allele Mining and Bioinformatics Tools and Techniques for Skill Development in Efficient and Tailored Crop Improvement” ka la poi noh sha kaba kut mynta ka sngi ha Conference Hall, Guest House jong ka College of Post Graduate Studies in Agricultural Sciences (CPGSAS), Umïam.
Ïa kane ka prokram la sdang naduh 24 tarik Kyllalyngkot haduh 13 tarik Rymphang, ha kaba ki riewstad, ki nonghikai na kylleng ka ri India ki la wan ban shim bynta ban ïoh jinghikai bad jingïarap ha ki bynta bapher bapher kiba ïadei bad ki buit thymmai kumno ban pynroi bad pynbha ïa ki jait jingthung.
Ha ka sngi pynkut, la wan ban shim bynta da u Dr. A.K. Mohanty, Director ka ICAR-ATARI, Zone VII Umiam kum u kongsan ha ryngkat ka jingdonlang u Dr. Ng. Tombisana Meetei, Course Coordinator, u Dr. Ram Singh, Dean COA & In-charge SSS CPGSAS, u Dr. Pranab Dutta, Chairman SCP CPGSAS, A. Pattanayak, Former Director ka ICAR-VPKAS bad ICAR-IIAB, u Dr. D. Thakuria, Dean CPGSAS bad u Prof. K. Noren Singh, In-charge School of Crop Improvement.
Ha kane ka sngi la sam ruh ïa ki syrnod sha baroh ki nongïashim bynta na kylleng ka ri India kiba la pyndep ïa ka jinghikai ha kane ka prokram ba 21 sngi
Haba kren ha kane ka sngi, u Dr. Mohanty u la ai jingïaroh ïa ki nongshim bynta bad u la kyntu ïa ki ban pyndonkam hok ïa ka jingstad bad ka jingnang jingtip kaba ki la ïoh lyngba kane ka prokram. U la ong ba ka jingeh kaba jur mynta ka long ha ka bynta ban pynkha bad pynmih symbai, la ka long ha ka rep ka riang, horticulture, fisheries ne kiwei pat ki bynta, kumta ka long kaba donkam ban wanrah ïa ki buit thymmai bad ka jingstad saïan ban pynroi ïa ka rep ka riang ha ka rukom kaba biang bad kaba neh.
Kane ka Winter School ka long ka sienjam kaba kongsan ban pynkhlaiñ ïa ka jinglah jong ki scientist bad ban kyntiew ïa ka rep ka riang da ki buit saïan kiba thymmai na ka bynta ka jingmyntoi jong ki paidbah bad ka ri hi baroh kawei.