Pynjari kyndon 163 BNSS ba khang tih bad shalan dewïong be-aiñ ha South West KHD

Mawkyrwat, Rymphang 12, 2026: U District Magistrate jong ka South West Khasi Hills District u bah Barnari Mawlong, IAS u la pynmih ïa ka Hukum katkum ka kyndon 163 jong ka Bharatiya Nagarik Suraksha Sanhita, (BNSS) kaba khang ban tih bad shalan dewiong be-aiñ hapoh ka South West Khasi Hills District.
Lah ban pynkynmaw ba ka jingtih mawshun ha ki thliew rat, kaba la shim ba ka long kaba ma ïa ka jingim briew bad ïa ka mariang, la khang da ka National Green Tribunal (NGT) ha u bnai Ïaïong, 2014. Wat hapdeng ka jingkhang, ki jingjia jong ka jingtih mawshun be-aiñ ki dang ïai bteng ban wanrah ïa ki jingma kiba khraw, kynthup ïa ki jingma kiba lah ban ktah ïa ka jingim briew, ka jingpynjot ïa ka mariang, bad ki jingpynthut kiba lah ban wanrah ïa ka jingsuk jingsaiñ jong ki paidbah.
Da kaba bud ryntih ïa ki jingbthah jong ka NGT bad da ka jingthmu ban khanglad ïa ka jingtih dewïong be-aiñ, ka jingshalan khlem jingbit, bad ka jingbret pathar ïa u dewïong, u District Magistrate u la mana bad khang pyrshah ïa kine ki kam hapoh u pud u sam jong ka South West Khasi Hills District baroh kata ka jingtih dewïong ‘rat-hole’ ha baroh ki jaka jong ka South West Khasi Hills District bad ka jingshalan ïa u dewïong khlem ki challan kiba biang, ki kot ki sla, lane ka jingbit/laisen ba la ai da ka bor ba dei peit bad na ka District.
Kano kano ka jingpynkheiñ ïa kane ka hukum kin sa hap ha ka jingpynshitom katkum ka kyndon 163 jong ka BNSS, nalor ka jingpynshitom katkum kiwei pat ki aiñ kiba don mynta kiba ïadei.
Da kaba pyrkhat ïa ka jingkyrkieh jong ka kam, la pynmih ïa ka hukum bad kan treikam noh mardor bad kan treikam haduh ban da mih kiwei pat ki hukum.
La bthah ïa ki paidbah ba kin bud ryntih ïa ka hukum.