Jowai, Rymphang 12: Ka ML-72 Rising Society Ltd kan sa pynlong ïa ka ML-72 Festival 2026 haka 13 bad 14 tarik February 2026 ka ban long ha Pdeiñ Mookhim Tourist Spot Wahiajer West Jaiñtia Hills District Meghalaya.
Ha kane ka Festival ba 2 sngi, kin sa don shibun ki jingïakop, ki nongput nongtem bad ka rwai ka siaw. Ha ka sngi sdang kata, ka 13 tarik February 2026 yn sa don ka jingïakop rwai 2 ngut (Duet Singing Competition), jingïakop tem (Battles of the Bands) bud sa ki nong rwai ba paw ka jylla kum u Ram Suchiang, Deimon Langki, Ksan, Jessie Lyngdoh bad DJ BRYAN bad ka Bumper Housie ba 30,00,000/- tyngka.
Ha ka sngi ba bud pat, kata ka 14 tarik February 2026 yn sdang da ka jingïakop shad (Dance Battles), ka jingïakop thei bhabriew (Beauty Pageant) bad ki jingrwai na u khlur nongrwai India Idol u Amit Paul. Kan sa don ruh ka Bumper Housie ba 10,00,000/- bad ka jingpynkhalai ïa ka Lucky Draw.
Na ka liang ki nongpynïaid jong ka Festival, ki la pyntip paidbah ba la khang pyrshah ïa ki briew ban wa die jingbam, lane ban die kino kino ki tiar ki tar sha ka jaka ba pynlong ïa kane ka Festival, lait noh kito ki ba la ïoh jingbit na ki nongpynïaid. Lada don ki ba leh pyrshah yn aiti sha ki bor ka ain.
Na ka liang ki nongpynïaid, ki khot bad phi baroh ban wan sakhi ïa kane ka Festival bad ban ai jingkyrshan ïa ki samla don sap ka jylla ha ki jingïakop bapher bapher.
