Nongpoh, Rymphang 11: Ka Hynniewtrep Youth Council (HYC) Ri-Bhoi Sepngi mynta ka sngi ka la leit hiar sha ka shnong Nongwah Paham Ryngkang ban ai jingïarap sha ka Umsow Lower Primary School, kaba dang donkam shibun ki jingkyrshan bad jingïarap.
Ka jingïarap ka kynthup ïa ka song pisa lem bad ki tiar skul kiba donkam. Ha kajuh ka sngi, la plie paidbah ruh ïa ka kamra klas thymmai jong katei ka skul da u President ka HYC Ri-Bhoi Sepngi, u Samla RC Thangkhiew, ha ryngkat ka jingïadonlang u Bah Pynsuk Kharsyntiew bad kiwei pat ki dkhot ka seng.
Ha kane ka prokram la ïadonlang ki nonghikai, ki nongïalam shnong, ki kmie ki kpa bad ki khynnah skul kiba la sakhi ïa kane ka sngi kaba kongsan ïa ka skul bad ïa ka shnong hi baroh kawei.
Haba kren ha kane ka sngi, u Samla RC Thangkhiew u la pynpaw ïa ka jingsngewkmen hadien ba la lah ban plie ïa ka kamra klas thymmai. Watla ka jingtei kam pat biang pura, hynrei ka seng ka la noh synñiang la ka bynta ban pynurlong ïa kane ka kam. U la ong ba ka seng ka kyrmen skhem ba kane ka skul, kaba dang shu ïaid kumba ar snem eiei, kan dang roi bad kiew shaphrang, khnang ba kan lah ban ai ka jingshakri kaba kham bha ïa ki khynnah ka thaiñ.
U la bynrap ruh ba ka HYC kan iai don ryngkat bad ka skul ha kano kano ka por ba donkam jingïarap, watla ka jingïarap ka long kaba rit, hynrei ka seng kan pyrshang katba lah ban kyrshan. U la pynpaw ruh ïa ka jingangnud ba ha ki snem ban wan, kane ka skul kan lah ban kyntiew kyrdan na ka LP sha ka UP, khnang ban myntoi shuh shuh ïa ki khynnah bad ïa ka shnong hi baroh kawei.
