Sdang ka AIU East Zone Inter-University Handball Tournament ha USTM, wan plie pyrda u Myntri Sports

Nongpoh, Rymphang 10: Ka University of Science and Technology Meghalaya (USTM) mynta ka sngi ka la sdang ïa ka AIU East Zone Inter-University Handball Tournament, ka lympung ïalehkai inter-university kaba heh tam ha ka thaiñ Mihngi, hapoh ka jingïalam jong ka Association of Indian Universities (AIU).
Ïa katei ka lympung la sdang da ka jingïalehkai ba nyngkong hapdeng ka Berhampur University, Odisha bad ka Banaras Hindu University, kaba la long ha Madan ïalehkai “Sports Complex” jong ka USTM. Ka jingïalehkai ka la khring shibun ki paidbah bad ki samla pule ban wan sakhi lang ïa kane ka jingïakop kaba heh.
Ha kane ka lympung, wan ban shim bynta da kumba 50 tylli ki skulbah na kylleng ki jylla jong ka East Zone, bad kumba 75 tylli ki kynhun ïalehkai kin aireng ha kane ka lympung.
Ïa kane ka lympung la wan ban plie pyrda da u Bah Wailadmiki Shylla, Myntri ka jylla ba peit ïa ka kam ïalehkai sports bad ka koit ka khiah, kum u kongsan. Ha kane ka sngi la donlang ruh u Bah Mathew Kenneth Makdoh, nominated MDC ka Nongpoh, u Narayan Bhuyan, nongïalehkai ba pawnam na Assam, u Bah Bobby L. Nongbet, District Sports Officer, Ri-Bhoi, ka Kong Dipa Choudhury, Joint Secretary, Assam Olympic Association, Gautam Choudhury, Associate Joint Secretary, Assam Olympic Association bad kiwei kiwei.
Haba kren ha katei ka jingïalang, u Bah Wailadmiki Shylla u la ong ba ka kam ïalehkai kam dei tang ka jingïakop ban jop takma hynrei ka long ka lad kaba khraw ban wanrah ïa ka jingïatylli, ka jingïaieid bad ka jingïadei hapdeng ki jylla bad ka ri hi baroh kawei. U la jingïaroh ïa ka USTM da kaba ong ba lyngba ka jingïapynlong ïa kum kine ki lympung ba heh, ka skulbah ka la plie lad ïa ki samla pule ban sngewthuh ba ka jingïajop kam dei tang ha ka pule puthi hynrei ruh ha ka jingïaid lynti jong ka jingim.
U la bynrap ruh ba ka Sorkar Jylla ka pynshlur ïa ki samla na Meghalaya ba kin mih shakhmat ha ki jingïalehkai bapher bapher, bad kito kiba ïoh ban khur takma ha ki kyrdan National kin ïoh kam sorkar.
Hadien ba la wai ka jingïalang plie paidbah, u Bah Wailadmiki Shylla kum u Myntri ba peit ïa ka koit ka khiah u la leit ruh ban ïakynduh ïa ki samla pule Medical, Ayurvedic bad Nursing jong ka skulbah, ha kaba u la ïa kren bad kitei ki samla pule kumno ban dang kyntiew ïaka koit ka khiah khamtam ka jingkitkhlieh jong ki samla ïaka jylla.