Shillong, Rymphang 10 : U Lat ka Jylla Meghalaya CH Vijayashankar ha ka sngi Nyngkong u la kitbok kitrwiang ïa ki rangïalehkai jong ka All Meghalaya Kick-Boxing Association (AMKA) ki ban leit ban mih khmat ïa ka Jylla bad ïa ka ri India ha ka lympung ïalehkai jong ka Asia Pacific Open Kickboxing Championship 2026 ha Bali, Indonesia ka ban long ha ka 28 tarik u Rymphang.
Ha kane ka sngi na ka liang u Lat u la ai ruh ka jingïaroh ïa ka kynhun halor ka jingpynkhreh jong ki da kaba aiti lut bad kumta u ong ba kum ka Jylla ka kitbok ba kin lah ban lehkai bha bad wanrah ïa ka burom.
Shuh shuh u ong ruh ba ka jingïoh jong u ban ïashim bynta ha ka lympung ïalehkai jong ki ri ka pyrthei ne ka international tournament ka la wanrah ïa ka jingsarong ïa ka jylla Meghalaya.
Ha kajuh ka por u Lat u la ïaroh ïa ka jingtrei shitom jong ka All Meghalaya Kick-Boxing Association ha kaba ïaleh ban kyntiew ïa ki sap ki phong ha kylleng ka Jylla bad ai ruh ïa ka rynsan ïa ki samla ba kin paw ha ki jingïalehkai ba ïakhun. Shuh shuh u la ong ruh ba ka ba ka kam ïalehkai kam tei tang ïa ka bor met hynrei ki pynroi ruh ïa ka jinglah ban shah ha ka bor pyrkhat, ka jinglong, bad kam nongïalam hapdeng ki samla.
Da kaba pynpaw ïa ka jingdonkam jong ka jingïalehkai ha kaba pynwan dur ïa ka imlang sahlang ka ban kiew shaphrang bad kaba sngewskhem, u Lat u la pynshlur ïa ki nongïalehkai ba kin ïai bteng ban pyntbit ban long ki nongïalehkai kiba kynsai bad ban long kum ki nongmuna ïa ki nongïalehkai kiba kwah ban long ki nongïalehkai ka jylla. U la pynpaw ruh ïa ka jingdonkam ban ïoh ïa ka jingkyrshan kaba skhem bad ka jingpynroi ban kyntiew ïa ka jingïalehkai martial arts bad kiwei kiwei ki jait jingïalehkai ha ka Jylla.
Ki thei bad ki rang ïalehkai ki la pynpaw ïa ka jingsngewnguh ïa u Lat ka jylla halor ka jingai mynsiem jong u bad kular ruh ba kin ai ïa kaba bha tam ha kane ka lympung ïalehkai ba la pynlong ha Bali, Indonesia, kaba la sakhi ïa ka jingïashim bynta na ki katto katne ki ri jong ka dewbah Asia – Pacific.
