Jowai, Rymphang 08: Hadien ba ka National Green Tribunal kala khang ïaka kam tih dewïong thliewkhnai hapoh ka jylla naduh u bnai Ïaïong, 2014.
Hynrei dang ha kine ki sngi bala dep kala don ka jingtih dewïong beaiñ bad ka jingleh bymkohnguh ïa ki kyndon aiñ bala dep pynmih, kaba la wanrah ka jingjia ba sngewsih bad duh ei ki mynsiem briew na kate ka jingtih dewïong ha shnong Mynsngat Thangkso East Jaiñtia Hills District.
Kumta na ka liang u Abhinav Kumar Singh, IAS, uba dei u District Magistrate ka West Jaiñtia Hills District, Jowai, ula pynmih syndon da ka hukum hapoh ka Section 163 jong ka BNSS ka ban treikam naduh ka 6 tarik mynta u bnai Rymphang, 2026.
Kane ka hukum kala khang pyrshah ban tih dewïong thliew khnai beaiñ, ha baroh ki jaka kiba hap hapoh ka West Jaiñtia Hills District.
La khang ruh ban shalan ïa u dewïong khlem ka Challan kaba biang, ki kot ki sla lane ka laisen bala ai da ki bor pynïaid District.
Kino kino kiba pynkheiñ ïa kane ka hukum kin ngad haka jingshah pynshitom katkum ka kyndon 163 BNSS.Kane ka hukum kan treikam noh mardor tad haduh bala pynbna da kumwei pat.
