Shillong, Rymphang 07: Ka kynhun ki khynnah ïalehkai jong ka Nongthymmai Nongkynrih SC bad ka Langsning SC ki la pynkut ïa ka lympung U-12 bad U-14 Football Leagues 2025-26 jong ka Shillong Sports Association kum ki lahduh hadien ba ki la jop ïa la ki jong ki jingïakhun phainal, ba la long ha ka sngi Saitjaiñ (07 tarik Rymphang) ha madan First Ground-SSA Stadium, Polo.
Ha ka phainal jong ka SSA U-12 Football league 2025-26, la ïohi ïa ka Nongthymmai Nongkynrih SC kaba la pynliem noh ïa ka Shillong Lajong da 4-0 kol ban pynthikna ïa ka nam lahduh, katba ka Langsning SC ka la jop da 3-0 kol pyrshah ïa ka Mawkhar SC
Ka Nongthymmai Nongkynrih ka la pynskhem ïa ka jingjop da kaba pynkhihjar lai sien ha ka kylla step lyngba u Roniki Kharshandi (7′), u Damewantei Kharkongor (21′) bad u Zevial Synrem (26′) shuwa ba u Dameteiskhem Lyngdoh (36′) un bynrap ïa ka kol kaba saw bad kaba khatduh ban pyndep ïa ka jingjop ba paka pyrshah ïa ki khynnah lehkai jong ka SLFC.
Ha ka phainal jong ki khynnah kiba hapoh 14 snem, ka jingïakhun ha ka kylla step ka la long kaba itynnad bad kaba ïaryngkat bor, ha kaba ka Langsning ka la ïoh ban lamkhmat da tang shi kol kaba la thep da u Nangteibha Mukhim (12′). Ha ka minit kaba 44 jong ka kylla miet ka Langsning ka la pynjlan ïa ka kol lamkhmat da 2-0 lyngba u D Syiem shuwa ba u Nangteibha (51′) un pyndep ïa ka jingjop da kaba pynkhih ïa ka kol kaba ar bad kaba lai na ka bynta ka kynhun.
Ha ka phainal la wan sakhi lang da ki dkhot nongkitkam ba rangbah jong ka Shillong Sports Association hapoh ka jingïalam jong u President bah Banteidor Lyngdoh, kiba la sam ïa ki syrnod bad ki takma sha ki lahduh bad kumjuh ruh ïa ka kynhun kaba wan ba ar.
Kum ki kynhun lahduh ka Nongthymmai Nongkynrih SC (U12) bad ka Langsning SC (U14) ki la ïohpdiang ïa ka trophy ryngkat ka khusnam pisa kaba Rs 20,000, katba ka Shillong Lajong FC (U12) bad ka Mawkhar SC ki la khur ïa ka song khusnam pisa kaba Rs 10,000 kum ki Runner’s Up.
Nalor kata la ïoh ruh ban sam ïa ki khusnam shimet sha ki khynnah ïalehkai kiba kynsai, ha kaba ka Nongthymmai Nongkynrih ka la synshar marwei ïa ki khusnam shimet ha ka kyrdan U12. U Roniki Kharshandi (Nongthymmai Nongkynrih) u la ïoh ïa ka nam ‘Top Scorer’, da kaba thep 20 tylli ki kol ha ka lympung baroh kawei, bad kumjuh ruh ïa ka ‘Player of the Final’ ha ka jingïakhun ba khatduh. U Mewanshwa Kharpuli u la khur ïa ka nam ‘Best Goalkeeper’ katba u Bashemphang Diengdoh ïa ka khusnam ‘Most Promising Player’.
Lai ngut ki khynnah ïalehkai jong ka Langsning ki la ïoh ban khur ïa ki khusnam shimet ha ka kyrdan U14, u Nangteibha Mukhim ïa ka Player of the Final, u Rohit Marsynting ïa ka nam ‘Best Goalkeeper’, u Evelkymio Mynsong u la shah jied ban khur ïa ka khusnam ‘Most Promising Player’, katba u Habankara Blah jong ka Pay For Right Academy u la ïoh ïa ka nam ‘Top Scorer’ da kaba thep 12 kol ha baroh kawei ka lympung.
