Ka jingdonlang ka balang Presibyterian bad Seiñ Raij dei ka mynsiem ïatreilang kum ka jaitbynriew: Fr Martin Shylla

Jowai, Rymphang 08: Ka Proseshon Ïukharist kaba shisien shisnem jong ka Mooksiang Parish kaba dei ban long ha Parish la pynlong ïa ka ha Thadmuthlong-A hynne ka sngi 8 tarik hapdeng ka jingiphuh iphieng da ka jingïadonlang ki Rangbah na ka Balang Presbyterian, ki Rangbah Nongkitkam ka Sein Raij (Niam Tre) Muthlong bad kiwei de ki riewkhmat na kiwei kiwei ki kynhun Balang bad da ki hajar ngut ki paid riewngeit kiba la ïawan shim bynta ha kane ka Proseshon Ïukharist kaba shisien shisnem jong ka Parish Mooksiang-Phramer, West Jaiñtia Hills District.
Ha ka por 10 baje mynstep la pynlong ïa ka jingkñia Mass Ïukharist bakhuid ha kaba u Phadar (Sohblei) Martin Shylla, Vicar General jong ka Jowai Diocese uba long ruh u Parish Priest jong ka Sutnga Parish, East Jaiñtia Hills ha ryngkat ka jingsynran lang ki Lyngdohsohblei (Phadar) kiba wan na kiwei kiwei ki Parish jong ka Diocese bad nabar.
U Phadar Martin Shylla haba kren ha kane ka sngi u pynpaw ïa ka jingkmen kaba khraw ïa ka jingïadonlang ki riewkhmat na ka Kynhun Balang Presbyterian, ki ‘riewkhmat na ka Seiñ Raij Muthlong bad kiwei de ki kynhun Balang bad u ong kane ka dei ka Mynsiem ka jingïatreilang kum ka jaitbynriew Khasi-Jaiñtia kiba don ha kine ki Lum bad ki Them kiba itynnat jong ka jaitbynriew. Haba phai sha ki paid riewngeit pat u ong ba ka snem 2026 ka dei ka snem jong ki ‘riewngeit, ki Synran jong U Khrist bad ban long ki Synran ba shisha jong U Khrist, ka paw ha ka jingim jinglong jong ngi ki khristan kaba man la ka sngi.
Haba pharia bad ïasam ïa ka ktien ka jong U Blei kaba la shim na u Phrophet Isaiah 58: 7-10, na ka shithi 1 u Paul Apostol sha ki Kor. 2:1-5 bad na ka Gospel Mt.5:13-16, u Phadar Martin Shylla u ong ban long ki Nongbud bad ki Synran bashishja jong U Khrist, ki Khristan ki dei ban don lai tylli kiei kiei. (1) ban long kiba sbun bad leh isynei ïa kiwei (2) ban pynshong nongrim ïa ka jingngeit ha U Blei ym ha ka bor jingstad briew bad kaba (3) ban long ka Mluh bad ka jingshai jong ka pyrthei. Nangta u batai shuh shuh ban long ka Mluh kamut ba ki ktien bad ki kam jong ngi ki dei ban long kiba thiang kiba bang ym ka ban pynsngewsih bad pynmong ïa U Blei bad ïala ki para briew bad ka jingshai ka long ba ngin long ka jingshai kaba pynshai ïa kiwei kiba don hapdeng ka jingdum bad lada ngi ïaid ha ka jingshai ngin ym ur ym hap shaduid shakharai bad u pynkut ïa ka jingkren da kaba kyntu ïa ki paidriewngeit ba une u snem 2026 u dei u snem jong ki riewngeit bad u kyrmen skhem ba ki paidriewngeit kin imbha im miat, im sngi ban pynbna ïa ka Khubor babha bad da ka jingim jinglong khristan kaba man la ka sngi, hala ïing halasem, ha shong ha thaw, ha ka imlang sahlang, ha ka Balang, ha ka Akor, ka burom ha ka ktien ka thylliej bad da kaba pynshong nogrim ïa ka jingngeit ha U Blei ym ha ka jingstad briew.
Ha ka nohphai sngi la pynlong ïa ka jingïaid proseshon Iukharist hapoh ka shnong Thadmuthlong-A ha kaba da ki hajar ngut ki paidriewngeit ki la ïashim bynta da ka jingshongshit da ki jingruwai, ki jingduwai riewblei ha ryngkat ka tem ka put ha shilynter lynti ka proseshon bad la pynkut ïa kane ka sngi da ka jingkyrkhu ba kyrpang na kti u Phadar Martin Shylla da ka Sakramen bakhuid tam ka duwan, ka Sakramen ha kaba u Trai Jisu U shongrieh ha ka dur jong u Kpu uba la pynkyntang.
Ha kane ka sngi ïa ki sur jingrwai kiba sngewtynnat ha ka por Mass bakhuid la lamkhmat da ki Nongrwai ka Xerian’s choir, Mawsynram Parish, Archdiocese Shillong.