Kut noh ka lympung ïalehkai phutbol ka TULBA, angnud ban pynshna iing baduk sha ka longiing ha Ri-Bhoi

Nongpoh, Rymphang 07: Ka lympung ïalehkai football ba la pynïaid da ka kynhun ki nongñiah thuk-thuk bala tip kum ka The Ultimate Legend Bikers Association (TULBA) Eastern Zone mynta ka sngi ka la poi sha kaba kut ha Madan Shnong Umroi, Umeit, da ka jingïakhun kaba itynnad hapdeng ka One United FC bad ka Kyllumlang FC ban ïa knieh ïa ka nam lahduh.
Kum ka jingpynkynmaw, kane ka lympung ka long katkum ka jingïohi jngai jong ki nongïalam TULBA Eastern Zone ban pynmih pisa na bynta ban kyrshan ïa ki longïing kiba duk bad kiba jynjar, bad khamtam eh ban lah ban kot sha ka thong ban pynshna ïing ïa kawei ka longïing kaba duk ba rangli ha kawei ka shnong ha Ri-Bhoi.
Ïa kane ka lympung la pynhap pyrda mynta ka sngi da u MLA ka Umroi u Bah Damanbait Lamare kum u kongsan, ha ka jingdonlang lang u Bah Raymond Kharbuli, 2nd In-charge ka Khapmara Police Outpost, u Bah P.B. Sylliamg, Secretary ka Synjuk ki Rangbah Shnong Ri-Bhoi, u Bah H. Marweiñ, President ka Ri-Bhoi Mihngi Sports Association, u Bah P. Malngiang, Rangbah Shnong Umeit, lem bad u Bah Samuel Kurbah, President ka TULBA Eastern Zone bad u Bah Damiyo Lamare, Secretary.
Haba phai sha ka jingïalehkai, ha ka jingïakhun ban ïa knieh ïa ka kyrdan ba lai, ka Western NCB ka la pynliem ïa ka Umktieh FC lyngba ka jingïashut tie-breaker. Kum ka kynhun ba wan ba lai, ka Western NCB ka la ïoh ban rah ïa ka song pisa kaba T.10,000 ryngkat bad ka trophy.
Ha ka jingïakhun phainal ban ïa knieh ïa ka nam lahduh, ka jingïalehkai hapdeng ka One United FC pyrshah ïa ka Kyllumlang FC ka la long kaba shongshit bad kaba itynnad bha ban peit. Ha kaba kut, ka One United FC ka la lah ban pynliem ïa ka Kyllumlang FC da 2-0 kol. Kum ka lahduh, ka One United FC ka la rah ïa ka song pisa kaba T.1 lak ryngkat bad ka trophy, katba ka Kyllumlang FC kum ka kynhun ba wan ba ar ka la ïoh ïa ka song pisa kaba T.50,000 ryngkat bad ka trophy.