SHILLONG, Rymphang 08: Ka kynhun ïalehkai jong ka Lok Bhawan ka la pynliem noh ïa ka NFU da 110 ron ha ka jingïakhun ïa ka Shillong Cricket League Super Division 2026 jong ka Shillong Cricket Association hynne ka sngi.
Haba tied nyngkong hadien ba jop ïa ka jingkynting pisa (toss) ka Lok Bhawan ka la kamai 204 ron shuwa ban khyllem baroh 10 wiket haki 39.1 ober. Kiba la ïalam ha ka tied ki long u Vishal Kanwar (54 ron naki 60 bol) bad u Aditya Shah (48 ron naki 44 bol).
U Tapash Das (7.1 ober: ailad 28 ron) bad u Akash Choudhary (8 ober: ailad 35 ron) ki la ïoh ban khur mar 3 wiket na ka bynta ka NFU.
Hynrei haba wan ban beh ïa ka thong, ka kynhun ka la shah weng lut baroh 10 wiket tang na ka bynta 94 ron haki 34.4 ober. Dei tang u Shubham Rasaily (31 ron naki 95 bol) bad u Akash Choudhary (20 ron naki 15 bol) kiba la kham seisoh ha ka tied.
U Ayushman Das u la khur 2/13 naki 5 ober, katba u Bikash Singha u la khur 3/22 naki 7 ober, ha kaba ka Lok Bhawan ka la jop suk da 110 ron. Ha kaba kut u Bikash Singha u la ïoh ban khur ïa ka nam ‘Player of the match’.
Ha ka jingïalehkai kaba la long ha ka sngi Saitjaiñ, ka Suptnik CC ka la pynliem jem haduh 238 ron ïa ka Lumpyngngad.
Ka Sputnik ka la lah ban kamai 309 ron haduh kaba kut jong ki 42 ober, bad hap 9 wiket, shuwa ba kan pynkhyllem noh ïa baroh 10 wiket jong ka Lumpyngngad CC tang na ka bynta 71 ron haki 20 ober.
Kiba la lamkhmat ha ka tied na ka bynta ka Sputnik ki long u Arien B Sangma (63 ron naki 68 bol) bad u Mark Ingty (57 ron naki 45 bol), katba u Swarajeet Das (8 ober; ailad 33 ron; khur 4 wiket) bad u Avinav Choudary (4 ovber; ailad 8 ron; khur 2 wiket) ki la noh synñiang da ka jingïalehkai ba kyrpang ha ka boling.
Na ka bynta ka jingïalehkai kaba kyrpang ha baroh ki liang, u Swarajeet Das (kamai 24 ron ha ka tied bad khur 4 wiket ha ka boling) u la ïoh ban khur ïa ka khusnam ‘Player of the Match’.
