Tura, Rymphang 5: Kila don ki katto katne tylli ki seng bhalang na ri lum Garo jong ka East Garo Hills ki la ujor da ka First Information Report (FIR) ne ka ejahar pyrshah ïa kawei ka kynhun khaïi dewiong lane ki mafia (coal syndicate or mafia) bym lah ban ithuh satia namar ba ki la kynnoh ba ki shalan dewiong beain da kaba pynkhein ïa ki jingbthah jong ka Supreme Court bad ki ain ba ïadei bad kane.
Ïa kane ka FIR la aiti lang sha u Officer-in-Charge jong ka Rongmil Outpost hapoh ka OGC Police Station ha ka 3 tarik Rymphang da ka Achik State People’s Front (ASPF), ka AHAM, bad ka GOERA NGO Rongmil Regional Unit.Ïa kane ka jingujor la soi da ki president bad secretary jong ki seng bapher bapher.
Katkum ka FIR, la ong ba la pynkit ïa u dewiong na ki thain Nongal jong ka East Garo Hills sha ka jylla ba marjan jong ka Assam khlem ki kot ki sla kiba biang.Ki seng bhalang ki la kynnoh ba ki trok kiba kit dewiong ki ju kit palat pud bad ki treikam khamtam ha ka por miet ha shilynter ka surak bah NH-62 bad NH-217 ban lait na ka jingshah talasi.
Ka jingujor ka ong ba ïa ki jingtip ha kaba ïadei bad katei ka jingkit beain la ïoh na uwei na ki nongniah trok, uba la pynpaw ba ïa katei ka kam la pynlong da ka kynhun runar ne mafia kiba la pynbeit ryntih.
Ki seng bhalang ki la kyntu ïa ki pulit ban register mardor ïa katei ka jingujor kum ka FIR, ban kurup bad bat ïa baroh ki kali ba la kit beain ne kiba la kit palat pud ïa u dewiong, bad ban pynlong ïa ka jingtohkit kaba bniah ban lap ïa ki nongbei tyngka ba kongsan bad ki riew shimet kiba donkti ha katei ka kam beain.
Shuh shuh kine ki seng bhalang ki la dawa ban pynngat da ka ain kaba tyngeh pyrshah ïa kiba donkti, da kaba pynpaw ba kum kine ki kam kim pynkhein tang ia ki hukum jong ka ïingbishar hynrei ki wanrah ruh ïa ka jingeh kaba khraw ïa ka mariang bad ka jingshngain ha ka thain.
Na ka liang jong ki pulit kim shym pat la ai satia ka jingkynthoh ha kaba iadei bad kane ka kam.
