Ngi la ngiah ïa ka tdem jaboh, khang tala ki paidbah ïa ka karkhana ha Byrnihat ba kynnoh treikam sop sop

Nongpoh, Rymphang 04: Ki paidbah nongshong shnong ka shnong Lower Balian haka thaiñ Byrnihat ha Ri-Bhoi District mynta ka sngi kila mih shakhmat ban pyrshah jur ïa kawei ka karkhana bala tip kum ka Shyam Century Ferrous Limited bala kynnoh ruh ba kadei ka karkhana kaba la shu pynïaid beaiñ ïa u eit dewiong shapoh khlem ka jingbit bad ki kot ki sla ba biang watla ïa katei ka karkhana la khang khyrdep ïaka ryngkat ka jingthoh nabar ka khyrdop.
Na ka liang ki paidbah naduh ki rangbah, ki longkmie ryngkat ki samla kila mih paidbah mynta ka sngi ban tur sha katei ka karkhana ryngkat ki placard ban pynrem jur ïakatei ka karkhana, ïaka tnad Meghalaya State Pollution Control Board ka jyla Meghalaya kaba shu shong aram tang na ophis khlem da leit jurip bad peit ïaki jingjaboh bad ka jingeh ki paidbah haka thaiñ Byrnihat kaba la pynsyrtok shisha ïaki paidbah nongshong shnong.
Ki paidbah kila kynnoh ruh ba da ki phew bad teng teng da ki spah tylli ki trok ki rung ki mih shapoh katei ka karkhana kaba la khang noh kaba la pynlyngngoh shisha ïaki paidbah nongshong shnong katba ka tdem eitdewiong kaba mih na katei ka jaka ka long kaba shyrkhei, khlem kano kano ka jingbit naka shnong, khlem da ioh ïaka trading License ban pynïaid ïa katei ka kam khaii eit dewiong.
Ha shuwa ban poi ki paidbah naka liang katei ka karkhana kala khang tala na shapoh, ryngkat ka jingsynran ki pulit ka Byrnihat, hynrei wat hadien ka jingkyrpad ki paidbah ban plie ym don satia ba wan plie kaba la pynlong ïaki paidbah ban shu khynniat ïaka khyrdop bad ioh rung shapoh bad aipor ruh tang 10 min ïaki bor pynïaid ba ki dei ban sei ïaki kot ki sla naei ki iohbor ban pynïaid ïa katei ka karkhana ban pynlong kum jaka pynlang ïa u eit dewong, hynrei namar ka jingmynthi jong ki, ki paidbah kila khang tala syndon namar kim lah ban sei ïaki kot ki sla naei ki ioh bor ban pynlang ïa u eit dewiong ha katei ka jaka watla nabar la thoh shai Plant Closed.
Haba kren sha ki lad pathai khubor naka liang ki paidbah nongshong shnong naduh u Bah Phrangsngi Pohtam, u Surajit D Sangma, bad u Himanta Timung kila ong ba kane ka karkhana bala khang kala treikam napoh napoh ban pynlong kum ka jaka pynlang ïa u eit dewiong, ban shalan pat sha kiwei ki jaka bad dei hadien ka jingbym lah jong ki briew katei ka karkhana ban sei ïaki kot ki sla bad naei ki iohbor ban pynïaid kumta kum ki paidbah kim banse ban khang tala syndon ïa kane ka karkhana.
Ki paidbah kila kynnoh ruh ba ki ophisar naka tnad Pollution ki shu wan tang kumba shiteng kynta bad phet noh na katei ka jaka khlem da tip pat kaei ka jingeh kaba ki paidbah ki mad man ka sngi, bad dawa ruh ba katei ka tnad ka dei ban leh da kaba tyngeh ïa kitei ki karkhana namar ki paidbah kim suk shuh ban im ban shong ban sah ha katei ka thaiñ.