Ngin kyndang lut ïa ki karkhana kiba pynmih bun ka tdem jaboh, byrngem ki paidbah ka Lower Balian

Nongpoh, Rymphang 04 : Tang hadien ka jingleit khang tala ïa kawei ka karkhana bala kynnoh ba kadei ka karkhana kaba la shu pynïaid beaiñ khlem ki kot ki sla kiba biang bad ka jingioh jingbit naka shnong, ki paidbah nongshong shnong ka shnong Lower Balian, Byrnihat kila byrngem ban leit kyndang lut ïaki karkhana kiba pynmih tdem jaboh khamtam ki don bun ki karkhana kiba la shu pynïaid beaiñ, khlem jer kyrteng kiba wat ki bor bahalor kim don jingtip.
“Ngi la im hapdeng ka jingsohsat wat tang ban thad jaiñ ruh ngim ioh shuh la bun satang ka tdem iong kaba bit bad sop lut ïaki shnong ki thaw, ki iing ki sem bad ki jingthung jingtep baroh kaba kum ki paidbah ki hap ban im hapdeng ka jingeh kaba khraw” la ong ki nongïalam shnong.
Lyngba kane ka kyrwoh ki paidbah kila maham ïa baroh ki karkhana ha katei ka thaiñ ban leit kyndang lut ïaki bad ki dei ruh ban da don ïaki kot ki sla ba biang lym kumta kin sa leh kumba leh ïaka Shyam Century Ferrous Limited.