Ka thma pyrshah Drok : Kyrpad u DGP ban ïatrei lang ki Dorbar Shnong

Shillong, Naitung 10: U Director General of Polic u Dr LR Bishnoi IPS ha ka sngi Saitjaiñ, u la pan ka jingïatrei lang na ki Dorbar Shnong bapher bapher ba kin snohkti lang na ka bynta ban ïakhun pyrshah ïa ka jingjyllei u drok bad ruh na ka bynta ban pynneh ïa ka shongsuk shongsaiñ ha nongbah Shillong.
Ïa kane u DGP u la pynsngew ha ka jingïalang kaba la wan ban shim bynta da ki Chairman jong ka Dorbar Jaïaw Pyllun bad ruh ka Lympung ki Hynriew Shnong, Rangbah Shnong, Rangbah Dong, Presi-dent bad Secre-tary jong ka Seng Kynthei bad Seng Samla jong ki dong bapher bapher kiba hap ha ka jingpeit jong ka Durbar Pyllun Jaïaw bad ruh ha ka Lympung ki Hynriew Shnong nalor kiwei kiwei, kaba la pynlong ha Jaïaw Shyiap Lumpyllon Community Hall
“Ka shongsuk shongshngaiñ ha ka jylla ka dei hi ka thong jong baroh ki nongshong shnong,” ong u DGP da kaba ïai ban ba dei tang ka jingtreilang bad ki nongïalam shnong bad kumjuh ruh ka imlang sahlang kaba lah ban pynurlong ïa kane.
U la ong ruh ba na ka liang ka tnad pulit ka don ka jingpyrshang ban rat dyngkhong ïa ki kam sniew ha ka jylla khamtam eh ïa ka jingjyllei u drok ym shuh tang ha nongbah Shillong hynrei wat ha ki jaka ba kyndong jong ka jylla. U DGP u la ban ïa ka jingdonkam ka jingïatreilang lang na baroh ki liang ban lah ban kem ïa ki nongkhaïi drok ha ka jylla.
Ha kajuh ka por u la ïathuh ba na ka liang ka tnad pulit ka don jingmut ban ai jinghikai ïa ka rukom pynïaid kali ïa ki samla kiba la ïoh jinghikai na ka National Cadet Corps (NCC) ba kin ïarap ha ka jingpynïaid kali ha ki kylleng ki bynta ka nongbah Shillong.
U DGP ka jylla u la ong ruh namar ka jingduna palat ki pulit ha ka jylla kiban peit ban teh lakam ïa ka jingdheng kali u ïathuh ba shen na ka tnad kan pyndonkam da kine ki samla NCC namar ka jingduna palat ki pulit kiban peit ïa ka jingpynïaid kali.
“Lada phi poi sha ki ri sepngi uwei u pulit un peit bad pynïaid na bynta ki lak tylli ki kali namar ka rukom jong ki shatai ka la long kaba ryntih” ong u DGP.
La don lang ruh ha kane ka sngi naduh ka IG CRPF, ka Sonal V. Mishra IPS , Commandant 67 CRPF, SP East Khasi Hills, SP City , SP Traffic bad kiwei kiwei ki heh pulit jong ka distrik.