Shillong, Naitung 10 : Ka Peoples Democratic Front ( PDF) ka dawa ba ka tnad Transport jongka sorkar jylla ka dei ban pynkylla ïa ka rai jongka ym ban pynsangeh mardor ïa ki nongkamai Rapido da ki scooty bad thuk thuk namar kane ka jingleh ka la ktah jur palat ïa ki samla kiba im jakpoh da kane ka kam. Ha ka jaka ban pynsangeh mardor na ka liang ka tnad ka la dei ban hukum ïa ka Deputy Commissioner bad DTO ba ki dei ban ailad ïaki ban pynbeit ne ban rejister lada jia ba kim pat dep register ruh.
Haba ïkren bad u Mawphor u President ka PDF uba dei ruh u myntri ka sorkar jylla ba peit ïa ka tnad ka rep ka riang bad kam ïalehkai sport u bah Banteidor Lyngdoh ula ong “ Kane ka jingpynmih hukum ba kynsan kynran jongka tnad Transport ka la ktah jur ïa ki samla kiba im jakpoh da kane ka kamai kajih. Namar kine ki khlem ïaknieh passenger bad ki Taxi kiba kamai ha surok hynrei ki briew kiba donkam ban beh sha ki kam ki jam jongki ha kane ka pyrthei ba jur ka jingdheng kali ki shu phone online sha ki bad ki sa phah leit buh ne phah wan shaw ïa ki. Kumta lada jia ba ka don kano kano kaba pynthut ïa kata ka kyndon Motor Vehicle Act dei ban pynbeit bad ailad ïaki la ki dei ban rejister ne pynbiang ïa ki kot ki sla. Kane ka jingïoh kamai jongki da kine ki arshaka ka la ïarap bha ïaki ban ïoh kam ïoh jam ha kane ka juk ba eh ban ïoh kam. Kine ki samla ki la lait na shibun ki jingpynshoi bad jingsniew khamtam na ki jingdih kyrni ha ki jingdih kyiad ne drok ruh. Lyngba kane ka kam ki don kiba kyrshan da lade ïa lade ban ïoh pyndep ïaki jingpule sha ki kyrdan kiba shalor ruh. Hynrei kane ka jingleh ka la khang lad khang lynti ïaki. Kumta nga dawa ba ka tnad transport ka dei ban shim khia ïa kane ka kam bad pynbeit ne weng noh mardor ïa kane ka hukum”.
Nalor kata ki paid nongshong shnong ruh ki la suk bha ha ka leit ka wan namar lyngba kine ki ar shaka ki la ban leit beh kam kylleng ki jaka hangne ha sor bad khapsor ruh. Kumta kane ka jinghukum kynsan ka la pyniap thngan ïa ki samla bad ka ïing ka sem ba ki hap ban kyrshan da kane ka jingkamai.
Lah ban pynkynmaw ba kine ki samla kiba im jakpoh da kane ka kamai ki la ïakynduh ha ka Sngi Saitjaiñ ha Madan Student Jaiaw bad ki la kyrpad ïaka sorkar ban thaw lad ban ym pyniap thngan ïa ki da kaba ki ong ba lada ka sorkar ka ai da ka permit ruh ki long kiba kloi ban pdiang wat ban siew ïa kino kino ki khajna ruh.
Namar ki don kiba pli kiba shim da ka ram na ki bank ban thied ïa ki arshaka tang ban ïoh kamai jakpoh kumta kane ka jingkhang ka RTA kan buh ïa ki haka jingeh wat ban ïoh siew ïa ka ram ka shah ba ki la shim ruh.
Kumta na ka liang u President ka PDF sa shisien u dawa ba ka tnad Transport jongka sorkar jylla ka dei ban pynbeit mardor ïa kane ka kam khnang ba ki samla kin ym kyrduh kam kyrduh jam bad iap thngan hynrei ba kin ïoh ban sdang biang ïa ka jingkamai kajih jongki.
