Shillong,Rymphang 03 : Ka Sorkar Jylla ka la theh haduh 36 klur tyngka ha ka kylla kaba nyngkong sha ki Synjuk ïalehkai ban pynkhreh na la bynta ka lympung ïalehkai kaba heh jong ka Ri ka National Games kaban long ha ka Jylla ha u snem 2027, la ïathuh u Myntri ka tnad Ïalehkai ka Jylla Bah Wailadmiki Shylla.
Katkum ka jingïathuh jong u Myntri ka Meghalaya kum ka trai jaka ka la pynkhreh mynta ban aireng lut ha baroh 39 tylli ki jait jingïalehkai ha kane ka National Games.
“Ngi la dep ban soi ïa ka kontrak bad ka jingpynkhreh mynta ka la ïaid shakhmat. Ngi la dep ruh ban pyllait haduh 36 klur tyngka ha ka kylla kaba nyngkong ban pynkhreh ïa ki kynhun jongngi bad ki Synjuk ïalehkai mynta ki la pyntreikam na la bynta ban thung ïa ki coach bad ki tiar ba donkam,” bynrap shuh shuh u Myntri.
Da kaba pynpaw ïa ka jingkyrmen ba ki Synjuk kin pyntreikam bha ïa ka song pisa, u Myntri u la ong ruh ba lada ki dang donkam ki lah ban kyrshan shuh shuh ïa ki.
U Myntri u la pynpaw ruh ka jingsngewhun bad ka jingïaid stet ka jingpynkhreh da kaba pynpaw ba ki don ïa ka jingkyrmen ba tang na ka ïakob siat khnam (Archery) ruh kin khur bun tylli bha ki takma.
“Ngi don ka jingkyrmen kaba khraw naba ki Synjuk ïalehkai ruh ki trei shitom bha da ka thong ban ïoh khur takma na man ki jingïalehkai ha kane ka lympung,” u la ong.
Shuh shuh u Myntri haba ïathuh pat halor ka jingtei ïa ki jaka ïalehkai u la ong ba ki projek bapher bapher ki don la ka jong ka jong ka por ban pyndep bad bun na ki la buh ba kin pyndep lut ha u Nohprah mynta u snem.
“Ngin pyrshang lut ban pyndep ha shwa ba ka National Games kan sdang,” u la kular.
Haba ïadei pat bad ka jaka sah jong ki nongïalehkai bad ki bor pynïaid na ka liang u Myntri u la ong ba ki pynshlur ban pyndonkam da ki homestay bad ki hotel bad kim don jingmut ei ei ban don ïa ka jaka ba kyrpang na bynta katei ka lympung ïalehkai kaba ki ju khot kum ka ‘Game’s Village’.
Katkum ka jingong jong u, ka jylla ka la pynkhreh ba ïa ki nongïalehkai baroh kin pynsah beit ha ki jaka kiba la don lypa.
