SHILLONG, Rymphang 01: Ka St. Joseph’s Church Mawkhar Parish, lyngba ka Programme Cultural and Sports Committee, kum ka dak ka jingrakhe ïa ka jingdap 75 snem ka parish, ka la pynlong ïa ka jingïakop mareh kaba jer kyrteng da ka ‘Jubilee Marathon 2026’ ha ka step jong ka sngi Saitjaiñ (31 tarik Kyllalyngkot), haba la ïohi ïa ka jingshim bynta ba shitrhem ki riewngeit wat ha ka rta kaba la Rangbah bha khlem da pynsngew ne kheiñ wat ïa ka jingkhriat bad pjah jong ka tlang ha ka por mynstep.
Ïa kane ka Marathon la sdang ha ka por 6 baje mynstep bad la kaweh ïa ka lama ban sdang ïa ka jingmareh da u MLA ka 17th North Shillong Constituency u Bah Adelbert Nongrum, uba la long Kongsan ha kane ka step, ha ka jingdonlang u Chairman ka KHADC u Bah Strong Piller Kharjana, ka Deputy Commissioner East Khasi Hills District Kong R Kurbah, u President ka Meghalaya Olympic Association Bah John F Kharshiing, u Parish Priest Rev Fr Leo Ïawbor bad Assistant Parish Priest Rev Fr Bensar Kharsati, ki Doktor kiba la pynkhreh ban ai jingsumar bad kiwei kiwei.
La sdang ïa ka Marathon na phyllaw ka Parish, mih sha Dorbar Syiem Mylliem, Motphran, Them Bijoy, Khyndailad, City Hut Dhaba, Polo Traffic point, Lad Lawmali, MIMHANS, Jaïaw Jingthang Briew, Jaïaw Mawbynna, Robert Hospital, Mawkhar Community Hall, Riatsamthiah, Top Saw Wahingdoh, bad la pynkut biang ha phyllaw Mawkhar Parish.“Ïa ka Marathon la pynlong da ki category ba kynthup ïa ki kynthei bad shynrang kiba la dap 36 snem haduh 49 snem kiba la pynhab hapoh ka Category III, nangta ha ka Category IV dei kiba la dap 50 snem shajrong kynthei bad shynrang.
La sdang ïa ka Marathon da ka jingduwai bad kren pdiang na u Rev Fr Leo Ïawbor bad la don ka jingbatai ïa ki Standard of Operation (SOP), la sam ïa ki medal sha ki nong jop ha ki kyrdan bapher bapher bad ïa ki syrnot ïashimbynta da u kongsan bad kiwei pat ki riewpaw khmat ka Parish.
Ki kyrteng jong ki nongjop ki long:
36-49 snem Kynthei
1st. Idalin Malngiang
2nd. Iadariti Sun
3rd. Thiodora Marweiñ
36-49 Shynrang
1st. Arnold M. Marbaniang
2nd. Lambert Marbaniang
3rd. Onder Marweiñ
50 snem shajrong (Kynthei)
1st. Donna M. Rani
2nd. Gloria Malngiang
3rd. Diana Wahlang
50 years above Men
1st. Readingmon Marbaniang
2nd. Mariahom Kharkrang
3rd. Ferdinand Nonkynrih
