Thaw history sa ka jylla Meghalaya, da ki lak tuid ki paidbah sha ka Meghalaya Revival &Healing Festival

Nongpoh, K’Lyngkot 31: Da ki lakh ngut ki paidbah kila tuid ban mad ïaka ktien jong u Blei sha ka Meghalaya Revival & Healing Festival kaba 4 sngi lynter kaba la pynlong da ka Gatekeepers (Meghalaya Chapter) ha Dieng Jabini Ground, Bhoirymbong ha Ri-Bhoi District naduh ka 27 haduh ka 30 tarik mynta u bnai bala sam da briew jong U Blei hapoh ka jingïalam u Apostle Ankit Sajwan bad ka Monika Sajwan kiba dei na ka Balang Family of Lord Jeses Church, New Delhi lem bad kiwei kiwei ki nongïalap naka jylla Meghalaya bad nabar.
Hynnin ka miet Sngi Thohdieng kaba dei ka miet ba pynkut ïa ka jingïalap kiba la poi sha ka jingïaseng kim duna ïa ka 1,80,000 ngut. Kane ka long kat kum ka jingkheiñ kaba la ai da ki stad jingkheiñ kiba la bishar na ki drone kiba pynher naduh ba sdang haduh ban da wai ka jingïaseng.
Naduh ka sngi sdang ki paidbah kila tuid shakatei ka jaka ban mad ïaka bor phylla ka jong u Blei lyngba ki kam bah bala leh da ki briew jong u Blei ha katei ka jaka naduh ka jingpynkhiah ïaki jingpang ki jingshitom bad wat kiba la don hapdeng ka jingthiah pang la bun snem kiba mad ïaki jait jingpang ba lai phew jait kila ioh ka jingkoit kaba mardor hadien ka jingpynduwai.
Lah ruh ban ong ba kane ka dei ka history haka jylla Meghalaya halor ka jingtuid ki paidbah ban sngew ban sngap ïaka ktien jong U Blei kiba thrang ban ïoh ka jingpynim sha katei ka jaka bala pynlong ïaka jingïaseng, ha kaba nalor ka jingsngap ïaka ktien ka jong u Blei bala sam ha kitei ki 4 sngi lynter ki paidbah na kylleng ki jaka bad wat nabar ka jylla ki tuid ryngkat ki jingpang jingshitom ban ieng lain ban ioh ka jingpynkoit lyngba ki jingduwai bala buh kyrpang naka bynta jong ki.
Haba pynkut noh ïa kane ka Meghalaya Revival & Healing Festival wat ki surok ki dap smam da ki kali khlem lait khih shuh kaba la wanrah ruh ka jingdheng kali kaba jur namar ka jingtuid u paidlang kiba kwah ban poi sha katei ka jaka ban mane bad ïaroh ïa u Trai u nongpynim jong ki riewngeit Khristan bad ka Meghalaya kala thaw ruh ka history hadien ka jingjop jong kane ka jingïalap bad ka jingpynkhiah dang shen haka jylla Nagaland.
Kane kam shym la dei shaphang kawei ka balang ne kawei ka kynhun niam, hynrei shaphang ki briew jong U Blei kiba ïawan lang ha ka jingsngewrit bad jingngeit, kiba ngeit na ka bynta ka jingpynthymmai ba kynja mynsiem, ka jingpynkhiah, bad ka jingkylla ha ka ri jong ngi ong ka kyrwoh naki bor pynïaid namar ka thong hi ka long ha ka jingduwai, ka jingshaniah ha U Blei, bad ka jingpynthymmai ïaka mynsiem bad kyrmen skhem ba kane kan pynrhem ïaka mynsiem jong uwei pa uwei u ba ngeit ha u Blei ba im bad uba shisha.