Nongstoiñ, K’ Lyngkot 30: Ka Nonglang Pungsier Anglers Association ka dei ka kynhun jong ki rawon na ka shnong Nonglang, Umwahlang bad kiwei kiwei ki shnong ba marjan kaba la seng naduh u snem 2006 kaba peit bad ïada na ka jingpynïap pathar ïa ki doh um doh wah ha ka wah Tyrsung bad ki shnat jong ka.
Naduh ba la seng ïa ka ki nongkitkam bad ki dkhot ki la ïaleh tyngeh ban khanglad ïa ka jingpynïap pathar ïa ki don um doh wah, ki mrad ki mreng, ki sim ki doh bad mana tyngeh ruh ïa kiba mlien ban wiang ding pathar ïa ki lum bad ki khlaw. Ka jingtrei shitom jong ki nongïalam bad ki dkhot jong katei ka Asociation ka la pynlong ïa kiwei pat ki seng kum ka Seng Ki Trai Khyndew Nongstong ba kin kwah ban ïatreilang namarba ka khyndew Nongstong ka dei kaba don mar syndah bad ka wah Tyrsung ka long kum u pud u sam kumta hadien bun bun snem ki nongkitkam jong ka Seng Ki Trai Khyndew Nongstong ki la ïakynduh ïa ki nongïalam ka NPAA bad hadien ka jingïakren sani bha ki nongïalam ka NPAA ki la mynjur ban pdiang ïa ka jingtyrwa jong ki ban ïatrei lang.
Kumta kitei ki artylli ki seng ki la thung da ka committee khnang ban pynkhlaiñ shuh shuh ïa ka jingtrei kam. Nalor ka Seng ki Trai Khyndew Nongstong ka don sa kawei ka seng jong ki Trai Khyndew Nonglang Pungsier kaba la wan ban ïatreilang bad ka NPAA. Kumta ban nang pynkhlaiñ shuh shuh ïa ka jingtreikam kitei ki lai tylli ki kynhun ki la thaw da ka Joint Committee khnang ba ka rukom trei kam kan long kaba sted bad kaba bit ba biang.
U Bah R.L.Nonglait President ka NPAA bad u Bah Usefulson Wanñiang secretary jong ka Seng Ki Trai Khyndew Nongstong bad Nonglang haba ïakren bad u nongthohkhubor u la ong ba ki nongïalam bad ki dkhot jong ka Joint Committee ryngkat ki dkhot jong ka NPAA ki la shimkhia bha bad ki la ju buddien ruh ban ïoh kem ïa ki riew shim kabu kiba thang dusmon ïa ki khlaw bad ki lum, kiba pynïap pathar ïa ki doh um ha ka wah Tyrsung bad ki shnat jong ka, kiba siat pathar ïa ki mrad bad kiwei kiwei.
Kitei ki nongïalam jong ka Joint Committee ki la ong ruh ba ki la pyrshang katba lah ban maham da kaba buh da ki sign board harud ka surok bah ba la thoh ïa ki kyndon ba la khang pyrshah ban thang dusmon ïa ki lum bad ki khlaw, pynïap pathar ïa ki don um ha ka wah Tyrsung bad ki shnat jong ka, siat pathar ïa ki mrad ki mreng bad haduh mynta ki riew shim kabu ki la kham dum wat la ki dang don hangne hangtai hynrei ki nongïalam ka Committee ki dang buddien ban lap ïa ki. Ki nongïalam ka Joint Committee ki la maham jur ïa kito kiba mlien ban leit tong doh ha ka por mynmiet ba ki dei ban sangeh noh shisyndon namar ki la dep ïoh jingtip ba ki don kiba leit tong doh ha ka por mynmiet bad ki pyndonkam ruh da u tutia ha ki tongsong ban dup ngat ki dohkha bad ki dei ban sngewthuh ba mynta ki dkhot ka NPAA bad ka Joint Committee ki la dep ïakut bad ba lada ki lap ïano ïano kiba leit tong doh ha ka por mynmiet na ka wah Tyrsung bad ki shnat jong ka kin ym kren shuh da ka ktien hynrei kin leh da ka kam bad lada jia eiei ïa kito kiba leit tong doh ha ka por mynmiet ki nongïalam ka Joint Committee bad ka NPAA kin ym kitkhlieh satia.
