Kylla um u drok ba shongdor `9.11 klur tyngka ha ka pajwa ba rhem ka Star Cement Lumshnong

Khliehriat kyllalyngkot 29: Hapoh ka jingïalam u Inspector General of Police (CID), Meghalaya, u Aditya Goenka, IPS ka kynhun jong ki pulit kiba na ki district bapher bapher jong ka jylla Meghalaya mynta ka sngi ki la thang pynduh pyndam noh ïa ki drok hapoh ka pajwa ne ka clink ba rhem bha jong ka company pynmih dewbilat jong ka company Star Cement Lumshnong East Jaiñtia Hills District.
Ki drok kiba la thang ki dei kiba ki pulit ki la ioh ban kurup na ki district bapher bapher bad haba kheiñ kyllum lang baroh ki drok ba la thang ki dei kiba shong dor haduh T9.11 klur tyngka lada kheiñ ha ka dor ïew jong ka International Price rate.
Haba kren sha ki pathai khubor u IGP (CID), u la ong ba ka jingthmu jong ka District Disposal Committees haba thang ïa ki drok ka long ban pyntikna ba ka jingpynduh pyndam ïa ki drok da kaba thang ka dei kaba long ha ka rukom ba long scientific bha kaba katkum ba la bthah da ka aiñ, u la ong ruh ba ki drok kiba la dep thang mynta ka sngi ki don haduh 183 grams of heroin, 296 kilograms u ganja, 9 kilogram ki drok methamphetamine, 2793 bilor ki dawai jyrhoh lane ki codeine-based cough syrup bad 534 R-7 ki dawai kuli.
U la ong ruh ba hapoh ka jingïalam u myntri rangbah ka jylla , u Conrad K Sangma, ka DREAM Mission kaba dei ka Mission kaba buh thong ban pynduh jait ïa u drok ka la ïaid shakhmat ha kaban tehlakam ïa ka jingkhaïi drok beaiñ bad kane ka Mission ka buh thong ruh ban shna ïa ki jaka ai jingsumar ne ki rehabilitation centre na ka bynta kito kiba pyndonkam drok, ka don ruh ka jingthmu ban pynkhlaiñ ïa ki prokram ai jingpynshai halor ka jingshyrkhei u drok, kane ka DREAM Mission ka dei kaba ka sorkar ka buh thong ha kaba ïadei bad ka jingiakhun pyrshah ïa u drok ban pynlong ïa ka jylla kaba lait na u drok.
U la ong ruh ba ki bor pulit jong ka jylla ki shim khia bha haduh katta katta ban pynlong ïa ka Meghalaya kaba lait na u drok bad kine ki drok kiba la thang mynta ki dei kiba na ki 58 tylli ki case kiba na ki district bapher bapher bad kane ka pyni shynna ïa ka jingshim khia ha kaba tehlakam ïa ka jingwan rung beaiñ u drok sahpoh jylla.
U la bynrap ruh ba ha man la ki kilo gram jong u drok ba la thang kam dei tang ban pynduh pyndam hynrei ka dei ruh ka synjam ba shakhmat ban iada ïa ki briew ba kin lait na ka jingkyrni bad jingshyrkhei kaba mih na kaba dih ne pyndonkam ïa u drok.
Ki drok kiba la thang ki dei kiba la ioh kurup da ki pulit na ki district bapher bapher kum ki drok kiba na East Khasi Hills District, West Khasi Hills District, South West Khasi Hills, East Jaiñtia Hills District, West Jaiñtia Hills District, Ri Bhoi District bad na ri lum Garo.
La ïa don ryngkat lang ruh u SP ka East Jaiñtia Hills, u Vikash Kumar, IPS, SP East Khasi Hills, Vivek Syiem, IPS, SP South West Khasi Hills, Banraplang Jyrwa, MCS bad kiwei kiwei ki heh pulit.