Nongpoh, K’Lyngkot 29: Kumba ju leh man la u snem, ki jait bynriew Karbi hapoh ka lama jong ka All Meghalaya Karbi Association (AMKA) kila pynlong biang ïaka 51st Annual Conference kaba dei ka jingïakynduh lang ba 2 sngi haka shnong Tamul Kuchi, Byrnihat ha kaba la sakhi ruh da ki hajar ngut ki khun ki hajar jong ka jaitbynriew Karbi kila wan ban ïakynduh lang ha kitei ki 2 sngi.
Ka jingthmu ba kongsan jong kane ka jingïakynduh ba shisien shisnem jong ki jaitbynriew Karbi, ka long ban lum ban lang ban wanrah ka jingïajan hapdeng para jaitbynriew kiba sah kylleng ki jaka haka jylla bad wat shabar jylla bad khamtam ban pynim ïaka jinglong tynrai, ki kolshor bad ki riti dustur bala buh naduh kulong kumah.
Nalor katei ka jingthmu ban wanrah ka jingïajan, ïatylli bad ïa ieid kum shipara ha katei ka jingïakynduh laa ioh ruh ban ïatai halor shibun ki kam kiba ïadei kumno ban wanrah ïaka bha ka miat, ka shongsuk shongsaiñ khamtam ban kyntiew ïala ka jong ka jaitbynriew haka liang baroh naduh ka pule ka puthi, ka roi ka par haka imlang ka sahlang, kumba ka jaitbynriew Karbi ki dang dei ki jaitbynriew ba rit paid hapoh ka jylla.
Lyngba kane ka sngi naka liang ki paid Karbi kila pynpaw pyrthei ruh ïala ki kolshor bad ki riti ki dustur naduh ka shad ka rwai tynrai bad kiwei kiwei kiba la buh u mynbarim ban pynpaw pyrthei ïaka jingriew spah ha kaba ïadei bad ka tynrai lem bad ka riti ka dustur.
Ha kane ka sngi la wan ruh ban sakhi da u Bah Sosthenes Sohtun Myntri ka tnad C&RD ka sorkar jylla ba dei ruh u MLA ka Jirang kum u kongsan, haka jingdonlang u Bah Mayral Born Syiem MLA ka Nongpoh, u Dr C Lyngdoh MLA ka Umsning, ka Kong Rona Khymdeit MDC ka Nongpoh bad kiwei kiwei ki riew rangbah, ki nongïalam Raid.
Haba kren ha kane ka sngi kum u kongsan naka liang u Bah Sosthenes Sohtun u la pynpaw ka jingsngewkmen kaba khraw ba kum ka jaitbynriew Karbi kila lum la lang ïaki khun ki hajar ban wanrah ka jingïajuh ïajan hapdeng ki para jaitbynriew kiba sah ha kylleng ki jaka bad ki thaiñ ban pynpaw ruh sha ka pyrthei ba ka jaitbynriew ka dang dei kaba khih kaba ksar bad kaba riewspah haka kolshor tynrai bad ka riti ka dustur.
U la ong ruh ba ka Jirang Constituency ka dei kaba kham kyrpang ha kaba ïadei bad ki kolshor tynrai bad ki riti ki dustur kaba don ruh kumba 12 jait ki jaitbynriew kiba im hapdeng ka suk ka saiñ hapoh kane ka constituency bad kum u MLA ka thaiñ u la pynpaw ka jingsngew sarong ïaka jaitbynriew Karbi ba ki dei ki jaitbynriew kiba burom ïala ka tynrai bad khamtam ban pynneh ïaka suk ka saiñ.
U la ong ruh ba kane ka jingïakynduh ka wanrah ïaka jingtehsong, ka jingïatylli bad ka jingïajan hapdeng ki jaitbynriew Karbi kiba sah ha kane ka dong Ri-Bhoi bad kiwei de na kylleng ki jaka haka jylla bad wat nabar ka jylla bad sngewkmen ba haduh mynta kine ki jaitbynriew ki shong ki sah hapdeng ka suk ka saiñ, namar ki jingkynad ki mih bunsien naka jingshah ïalam bakla bad ka jingsngewthuh bakla hynrei u la kyrpad ïa kitei ki jaitbynriew ban long kiba ieid ïaka jingsuk khnang ba ka imlang ka sahlang kan shong hapdeng ka suk ka saiñ watla ka Jirang ka dei ka constituency kaba la khleh bun ki jaitbynriew.
