Khliehriat, Jymmang, 01: Ka Star Cement Lumshnong lyngba ka Corporate Social Responsibility (CSR) ha ka sngi Palei ka la ai ïa ka baibam Scholarship For Pursuing Higher Education na ka bynta ki 98 ngut ki samla pule na ka shnong Lumshnong, East Jaiñtia Hills ba kynthup 52 ngut ki shynrang bad 46 ngut ki kynthei ban bteng ïa ki jingpule kiba kham shalor.
Ïa kine ki samla pule ka Star Club Lumshnong ka la sam ka cheque.
Kane ka Scholarship For Higher Education ka long ba ka Star Cement Lumshnong ka ïarap mar shiteng ka jingsiew ka ban ïai bteng manla u snem haduh ba ki samla kin da pyndep ka jingpule jong ki.
Ki samla pule kiba ïoh ïa kane ka baibam ki kynthup kito kiba pule ïa ka MBBS, B.Sc, B.Sc Nursing, Diploma Course, Engineering, Designer bad kiwei kiwei ki jingpule kiba kham shalor.
Haba kren ha ka jingïalang Unit Head jong ka Star Cement Lumshnong u Laxmaiah Munjala u la ai ka jingkhublei kitbok kitrwiang ïa ki samla pule kiba ïoh ïa kane ka baibai ba kin nang kiew shaphrang ha ki jingpule ki tad haduh ba kin da kynjoh sha ka thong bad u la ong ba kane ka baibam ka long kum ka jingïarap bad ka jingkyrshan lem na ka kompeni kaba long ka jingmyntoi khamtam kito ki samla kiba wan na ki longïing kiba duna ka ïoh ka kot.
U AVSM VSM (Retd) Sr. GM HR & ADM, VM RV Ramkishore u pynshlur ïa ki samla pule ba kin poi sha ka thong bad u la ong ba ka jingnoh synniang jong ka kompeni ka long ban kyntiew ïa ki shnong ki thaw, ïa ki kam lehkai sport, ïa ka pule puthi bad ban kyntiew ïa ki paidbah nongshong shnong.
Ha kane ka sngi, la sakhi lang da u Manager ka CSR Star Cement u Kingshok Borah, ki samla pule kiba ïoh pdiang ïa ka baibam, ki kmie ki kpa bad kiwei kiwei.
