9 tarik yn pynlong jingïakhih ka NESO ha kylleng ki nongbah ka North East

Shillong, Naiwieng, 05: Ka Kynhun ki sengbhalang jong ka thaiñ Shatei Lammihngi ka ri India kiba don hapoh ka shatri jong ka North East Students Organisation (NESO) ha ka sngi U Blei kan pynlong ïa ka jingïakhih ha ka 9 tarik mynta u bnai ha kylleng ki nongbah jong ki jylla ka thaiñ Shatei Lammihngi halor ka kane ka jingïakhih ka long halor ka jingsngap kuman jong ka Sorkar Pdeng bad ka bym shym la shimkhia ban pynbeit noh ïa ka jingïaumsnam kaba la jia ha ka jylla Manipur.
Ha u kyrwoh, ka NESO ka la dawa ïa ka Sorkar Pdeng ba kan shimkhia mardor ban pynbeit khnang ban wanrah ïa ka shongsuk hapoh ka jylla Manipur.
“Ka NESO ka pynaw ïa ka jingsngewkhia halor ka jingïaumsnam bad mynta la hynriew bnai ki la ïaid hynrei ka shongsuk shongsaiñ kam pat wan phai satia ha ka jylla Manipur,” ong u kyrwoh ba la soi da u Chairman u Bah Samuel Jyrwa bad u Secretary General u Mutsikhoyo Yhobu bad bynrap, “kane ka pynpaw ïa ka jingshim sting jong ka Sorkar India ban pynkut ïa kane ka jingïakajia ha ka rukom kaba dei bad kane ka la buh jingma ïa ka jingim briew bad ki jingdon jingem khamtam eh ïa ka pule ka puthi jong ki khynnah.”
“Kane ka jingïakhih ka long kum shi bynta ban pynpaw ïa ka jingpyrshah pyrshah ïa ka jingshim sting jong ka Sorkar India ban pynkut noh ïa ka jingïaum snam kaba la neh jin haduh hynriew bnai kynthih ha ka jylla Manipur bad dawa ïa ka Sorkar India ba kam dei shuh ban dang phai lyndet ban wad ïa ki lad ki lynti kuino ban pynkut noh ïa kane ka jingïaumsnam kham kloi da kaba khot sha ka miej jingïakren ïa ki kynhun bapher bapher” ong u kyrwoh.