Mawkyrwat, ‘Nailur, 06: Ka long kaei kaei ka jingpynduh mynsiem ïa ki nongbylla sngi ha kaba kawei ka Company Multi Tech kaba la phah trei ïa u Tower Mobile uba don ha shnong Domsohkhai (Nongnah), South West Khasi Hills District ba haduh mynta kam pat lah ban siew dep ïa ka pisa sha ki nongpyntrei.
Katkum ka jingïathuh u bah Karmelo Marweiñ uba dei u khlieh duh ne kum u Head Mistery ha ka jingpyntrei ïa u Tower Mobile ha shnong Domsohkhai (Nongnah), South West Khasi Hills District u la ïathuh ba pisa ba dang sah ka bym pat ïoh ka dei haduh 1 lak 40 hajar kata naduh u bnai Nohprah, 2022 haduh mynta.
Kumta halor kane, ka Hynñiewtrep Achik National Movement (HANM) jong ka South West Khasi Hills District hadien ka jingïoh jingujor na u bah Karmilos Marweiñ ki la ban jurip bad ïa kynduh ïa u bad ki la buh ka jingmaham bad ka jingkyrpad ïa ka kompany ba hapoh shi taïew kata hapoh ka 12 tarik ‘Nailur, 2023 kane ka kompani ka dei ban siew dep noh bad lada kam siew ha ka 13 tarik mynta u bnai ka seng kan sa leit ban khang tala noh ïa utei u Tower u ba don ha Domsohkhai (Nongnah), South West Khasi Hills District.
Ïa kane ka jingleit jurip la ïalam da u bah Lambokstar Marweiñ, President bad u bah Rishanskhem Lyngdoh, Education Secretary jong ka HANM South West Khasi Hills District ha ryngkat ki dkhot.
